K. Z. Homitov iqtisod fanlar doktori, dotsent

Lizing beruvchi – lizing shartnomasi bo‘yicha lizing obyektini keyinchalik lizing oluvchiga berish maqsadida mulk qilib sotib oladigan bank yoki lizing kompaniyasi yoxud ularning shu’ba kompaniyalari (qonunchilik hujjatlari bo‘yicha lizing beruvchi bo‘lib, nafaqat lizing kompaniyalari yoki banklar, balki har qanday yuridik va jismoniy shaxs ham lizing beruvchi sifatida maydonga chiqishi mumkin).
Lizing obyekti - tadbirkorlik maqsadlarida foydalaniladigan, iste’mol etiladigan ashyolar. Yer maydonlari, foydali qazilmalar, tabiiy boyliklar, qurol va o‘q-dori, atom hamda gidroelektrostantsiyalar qonunchilik bilan erkin muomalada bo‘lishi ta’qiqlangan yoki muomala qilishning alohida tartibini belgilash talab etiladigan va iste’mol etilmaydigan ashyolar bundan mustasno.
Lizing oluvchi – lizing shartnomasi bo‘yicha lizing obyektiga vaqtinchalik egalik qilish va foydalanish uchun oladigan yuridik shaxs, yakka tartibdagi tadbirkor yoki jismoniy shaxslar.
Lizing shartnomasi – lizing jarayonida ishtirok etuvchi tomonlarning munosabatlari aks etadigan asosiy hujjat.
Lizing sotuvchi – lizing beruvchiga lizing obyektini sotuvchi yuridik yoki jismoniy shaxslar.
Lizing subyektlari – lizing oluvchi, lizing sotuvchi va lizing beruvchilar.
Loyiha administratori - menejerning administratorlik vazifasini bajarib, menejerning 50 foizgacha ish vaqtini tejaydigan shaxs.
Loyiha injeneri - injenerlik faoliyati bilan shug‘ullanish uchun ruxsatnoma olgan va loyihaning bajarilishi, ishga tushishi bilan bog‘liq bo‘lgan barcha xizmatlarni amalga oshiruvchi shaxs.
Loyiha ishtirokchilari - yirik loyihaning asosiy elementlaridan biri undagi ishtirokchilarning ko‘pligidir. Ular loyihaning muvaffaqiyatli ishga tushishida eng katta o‘rinni egallaydi. Loyiha ishtirokchilarining har birini loyihada o‘ziga biriktirilgan funksiyalari va vazifalari bo‘ladi.
Loyiha ishtirokchilari riski – ishtirokchilarning loyiha faoliyati doirasida o‘z majburiyatlarini anglagan holda yoki majburiy tarzda bajarmaslik riski.