«ветеринария» ихтисослиги бўйича олий ўҚув юртлари учун қЎлланма ички юқумсиз касалликлар фанидан

Электрофорез (Ионотерапия) ҳам худди гальванотерапиядагига ўхшаш бўлиб, бунда фаол электроднинг гидрофил чўнтакчаси керакли модданинг маълум концентрацияли эритмаси билан намланади. Ионогальванотерапияда ҳам фаол электроднинг қутби ишлатиладиган эритманинг заряди ва даволашнинг мақсадига қараб аниқланади. Манфий зарядли ионлар (анионлар) анод орқали, мусбат зарядли ионлар (катионлар) катод орқали чиқарилади.
Электрофорезда қўлланиладиган эритмаларнинг заряди:
Анионлар (-) Катионлар (+)
Калий, натрий йодид, 2-5% Кальций хлорид, 2,5%
Калий, натрий бромид, 2-5% Мис сульфат, 1-2%
Натрий хлорид, 2-5% Адреналин, 0,1%
Ихтиол, олтингугурт, 3-5% Биомицин, 1000 ТБ/кг
Натрий фосфат, 2-5 % Новокаин, 3-5%
Натрий салицилат, 2-5% Стрептоцид, 3-5%
Пенициллин, 5000 ТБ/кг Стрептомицин, 3000 ТБ/кг

Йод ионлари отларда кўпинча ярим ўткир ва сурункали тендовагинитлар, пай чузилишлари, фибринли периартрит ва периоститларни даволаш, инфильтратларни қайта сўрилишини тезлаштириш мақсадида, кальций ионлари - рахит, остеомоляция касалликларини даволашда, олтингугурт ва салицилатлар ревматизмларни даволашда, мис ва рух препаратлари эса қийин битадиган яраларни даволашда ишлатилади.

Токнинг зичлиги 0,2-0,3 мА/см² бўлган ҳолда муолажа 30-60 дақиқа давом этади.
Дарсонваллаш - юқори частотали (110 кГц), юқори кучланишли ва кичик ток кучига (0,02 мА) эга бўлган электр токи билан даволаш. Маҳаллий дарсонваллашда Искра-2 аппарати, умумий дарсонваллашда бир неча электродлардан иборат бўлган «Соленоид тўри» ишлатилади.
Искра-2 аппаратининг турли шаклдаги вакумли электродлари бўлиб, бу электродлар электродтутқич ва ўтказгичлар ёрдамида аппаратга уланади. Шиша электродлар ичидаги ҳаво босими 0,5 мм симоб устунигача пасайтирилган бўлади. Электродлар терига яқинлаштирилганда, тери билан электроднинг шиша девори ўртасида терига кетма-кет йуналувчи бинафша рангли учқунлар пайдо бўлади. Сеанс 15-20 дақиқа давом этади. Кунига ёки ҳар икки кунда бир марта, жами 10-20 сеанс тавсия этилади.
Дарсонваллашдан қийин битадиган жароҳат ва яралар, фурункулёз, периферик асаб тизими касалликлари, энтералгия ва спазматик коликларни ҳамда итлар ўлатининг асоратларини даволашда фойдаланилади.
Фарадизация деб частотаси 20-60 Гц, ток кучи 25-50 мА, кучланиши 50-80 В бўлган импульсли электр токи билан даволашга айтилади. Бунда импульсланувчи ток таъсирида мускулларнинг ритмик қисқаришлари ва бўшашишлари натижасида қон ва лимфа томирларининг бир маромда тўлиб ва бўшашиб туриши таъминланади. Натижада қон ва лимфа айланиши ҳамда тўқималарнинг озиқланиши яхшиланади.
Фарадизацияда АСМ-2, АСМ-3 русумли электр импульсаторларидан (50-100 гц) фойдаланилади. Фаол электроднинг юзаси 1-5 см², пассив электродники - 200-300 см² ни ташкил этади. 10-15 дақиқадан кунига ёки ҳар икки кунда бир марта, жами 20-40 сеанс тавсия этилади.
Фарадизация усулидан фалаж ва ярим фалажлар, мускуллар атрофияси, катта қорин ва ичаклар атонияси каби касалликларни даволашда фойдаланилади.
Йирингли жараёнлар, мускуллар нерв аппарати жароҳатланиши пайтларида фарадизация ўтказиш тавсия этилмайди.