Vaziyatga huquqiy baho bering

1-kazus

Advokat Aliyev qasddan odam o’ldirish jinoyatini sodir etishda ayblanayotgan Usmonovni o’z himoyasiga oldi. Mijozi bilan bo’lgan suhbatlardan birida ayblanuvchi advokat Aliyevga bundan 2 yil oldin olti yoshli bir qizchani zo’rlab, keyin o’ldirganligini aytib qo’ydi. Bu qizning ayblanuvchi ta’riflab bergan belgilari advokat Aliyevning 2 yil oldin noma’lum shaxs tomonidan zo’rlab, keyin o’ldirib ketilgan qizining belgilariga juda o’xshar edi. 

Vaziyatga huquqiy baho bering. Advokatlik siri, advokatning Kasb etikasi qoidalari va tegishli qonunchilik asosida advokatning keying xatti-harakatlarini tahlil qiling.

2-kazus

2022-yilning mart oyida Yunusobod tuman hokimi A.Azimov tuman hokimining 2013-yil sentabrdagi fuqaro S.Rizvanovga Yunusobod tuman, 12-daha, Mirhalil ota ko'chasida joylashgan 0.09 ga yer maydonini savdo do'konlari qurish uchun ajratib berish to'g'risidagi qarorini bekor qilib, mazkur yerni "Davr Mega" MCHJga tadbirkorlik faoliyatini amalga oshirish maqsadida ajratish to'g'risida yangi qaror qabul qilgan. Fuqaro Rizvanov mazkur qarordan norozi bo'lib, ma'muriy sudga da'vo arizasi kiritgan va sudda o'z qonuniy huquq va manfaatlarini ifoda etishi uchun "Yurida ishonch" advokatlik firmasi advokati A.Qosimov bilan yuridik xizmat ko'rsatish shartnomasini tuzgan. Advokat A.Qosimov mazkur ishda da'vogarning ishonchli vakili sifatida ishtirok etishga kirishgan.

Sud muhokamasi davomida ma'lum bo'lishicha, advokat A.Qosimov 2015-yilda advokatlik faoliyatini boshlagunga qadar bir qator davlat tashkilotlarida, jumladan Yunusobod tuman hokimiyatida ham yurist lavozimida ishlagan. Tuman hokimining 2013-yildagi qarori qabul qiliingan davrda A.Qosimov hokimiyat yuristi bo'lgan va tuman hokimi A.Azimov ushbu davrda tuman hokimining 1-o'rinbosari sifatida faoliyat yuritgan.

Vaziyatga huquqiy baho bering.
1. Advokatning sud muhokamasidagi ishtirokini davom etttirishi masalasi qanday hal etiladi?
2. Advokatning mazkur ishda vakil sifatida qatnashishga rozi bo'lishi advokatning kasb etikasi qoidalariga zid keladimi?