Vatanimiz tarixi, xalqimizning ozodlik uchun kurash yoʻli haqida aholining bilimini oshirishda muzeylarning oʻrni muhim

Vatanimiz tarixi, xalqimizning ozodlik uchun kurash yoʻli haqida aholining bilimini oshirishda muzeylarning oʻrni muhim. Muzeylar tariximizni oʻrganishga, kechagi va bugungi hayotni taqqoslab, jamiyatimiz taraqqiyoti haqida toʻgʻri xulosa chiqarishga xizmat qiladi.
Joriy yilning 6-sentyabr kuni dars mashgʻulotlaridan keyin Prezident ta'lim muassasalari agentligi koʻrsatma xati ijrosi doirasida Erkin Vohidov nomidagi ijod maktabida tuzilgan rejaga asosan 7, 8-sinf oʻquvchilari Margʻilon shahridagi “Kaptarli mozor” ziyoratgohiga, Jahon otin Uyavsiy uy muzeyi va Fargʻona viloyati tarixi va madaniyati davlat oʻlkashunoslik muzeyiga tashrif buyurdilar. Ushbu tashkillangan ajoyib sayohatda oʻquvchilarga sinf tarbiyachilari hamrohlik qildilar. Muzeylar — tarixning sirli xilqatlarini oʻzida mujassam etgan holda xalqlar madaniyatini, qadriyatlarini tarannum etuvchi maskan va davlatlarni bir-birlariga yaqinlashtiruvchi koʻprik hisoblanadi. Shu bilan birga, xalqning maʼnaviy dunyosini boyitish, yosh avlodni Vatanga muhabbat va sadoqat ruhida tarbiyalashda ham muzeylarning oʻrni beqiyos. Muzeylar har bir xalq tarixi, madaniyati, turmush tarzi, milliy anʼana va qadriyatlarini oʻrganish, ularni targʻib etish va kelgusi avlodlarga yetkazishda muhim ahamiyat kasb etadi. Adabiyotga, tarixga qiziqqan o‘quvchilar qalbida o‘ylaymizki, bugungi kuniga va kelajagiga bo‘lgan ishonchlari yanada mustahkamlanadi. Bizga yaqindan yordam bergan va kerakli ma’lumotlarni bergan aziz muzeylar jonkuyarlariga tashakkurlarimizni izhor etamiz!