„Vatan tuyg‘usi kitobidan

Burch
Har bir fuqaro o‘z huquqini yaxshi bilsa, Konstitutsiya belgilab bergan qonun va qoidalardan xabardor bo‘lsa, hayotda qiynalmaydi. Chunki eng qiyin va murakkab ishlarning yechimi ham huquqshunos tomonidan osonlikcha topiladi.
Shu jihatdan Konstitutsiyani o‘rganishning ahamiyati katta. Uni bilish tufayli har bir fuqaro o‘z davlatining asos va tamoyillari bilan yaqindan tanishadi. Shu tufayli kishilar qalbida qonunga hurmat hissi uyg‘onadi. Qonunchilikka amal qilgan, insoniy qadriyatlarni hurmat qilgan jamiyatning kelajagi porloq bo‘ladi. Chunki bu mamlakat adolat tantanasi uchun kurashadi, fuqarolarning erkin va farovon hayot kechirishlariga kafolat beradi. Demokratik va huquqiy jamiyat odamlar ongida huquqiy bilimni shakllantirish va huquqiy madaniyatni qaror toptirishni taqozo etadi. Demak, har birimiz huquq va majburiyatlarimizni yaxshi bilishimiz zarur.
(„Vatan tuyg‘usi“ kitobidan)


Yaxshilik yerda qolmas
Ari suv ustida uchib yurib, birdan suvga tushib ketdi. Qanotlari ho'l bo'ldi. Arining uchishga kuchi yetmadi. Shu payt arini kabutar ko'rib qoldi. Unga rahmi keldi. Kabutar cho'pni tishlab, suvga tashladi. Ari cho'pni kema qilib, halokatdan qutuldi. Bir bola tuzoq qo'yib, kabutarni tutmoqchi bo'ldi. Ari buni ko'rib qoldi. U shu zahoti kelib, bolaning qulog'ini chaqdi. Bola og'riqqa chidolmay tuzoqni tashlab, qulog'ini ushladi. Kabutar uchib ketib, falokatdan qutuldi.
Me'moriy obidalar
Biz yashayotgan ikki daryo oralig'ida joylashgan zamin O'zbekistondir. Yurtimizda qadimiy va navqiron shaharlar ko'p. Ulardan Samarqand, Buxoro, Xiva kabilar dunyoga o'zining me'moriy obidalari bilan mashhurdir. Samarqanddagi Registon maydoni, Shohi Zinda ansambli, Go'ri Amir maqbarasi, Bibixonim madrasasi, afsonaviy Buxorodagi Ark qal'asi, Ismoil Somoniy maqbarasi, Chor minor majmualari, Labi hovuz ansambllari, Ko'hna Xivaning Ichan qal'asi, Juma masjidi, Kaltaminor, Pahlavon Mahmud maqbarasi, Dishan qal'a, Toshhovli va boshqalar bunga misoldir. Bu muzey-shaharlarga dunyoning barcha burchaklaridan har yili minglab sayyohlar kelib, tarixiy yodgorliklarimizni zavq bilan tomosha qiladilar. Ular aynan mana shu obidalarimizni ko'rib hayratga tushadilar.