Vatan, sajdagohim, oltin beshigim, O'zing talpinganim, qalbda qo'rg'onim

Vatan
Vatan, sajdagohim, oltin beshigim,
O'zing talpinganim, qalbda qo'rg'onim.
Qaynoq mehring tortar ohangrabodek,
Sensan, tilimdagi shirin zabonim.

Tomirda jo'sh urgan har bitta zarra,

Senga talpinadi, tuyuqsiz, bebosh.
Suysang onamdayin suyding beminnat,
Yaxshi-yomon kunda bo'lib yelkadosh.

Sarg'aygan dashtingda o'sgan har yantoq,

Oltin-u olmosdan, zardan-da afzal.
Tarixing zar bilan bitilgan kitob,
Har bir kuning bo'lsin bundan-da go'zal!

Vatan – sen qalbimdan to'kilgan she'rim,

Seni dengizdayin to'lib kuylayin.
Menga senday jannat ato qilganchun,
Taqdirga ming bora ta'zim aylayin!