V. A. Kosteckiy MÁmleket hám huqíq tiykarlarí

Hákimshilik jazanıń maqseti:
 
— hákimshilik  huqıqbuzarlıq  islegen  shaxstı  nızamlarǵa  ámel  etiw 
hám olardı húrmet etiw ruwxında tárbiyalaw;
 
— mine  usı  huqıqbuzardıń  ózi  tárepinen  de,  basqa  shaxslar  táre-
pinen de jańa huqıqbuzarlıq isleniwiniń aldın alıw.
JÁRIYMA SALÍW, ZATLARDÍ ALÍP QOYÍW (KONFISKACIYA), 
ARNAWLÍ JEŃILLIKLER (HUQÍQLAR)DEN 
AYÍRÍW TÁRTIBI
Ózbekistan  Respublikasınıń  Hákimshilik  juwapkershilik  haqqındaǵı 
kodeksiniń  332-statyasına  muwapıq,  járiyma  huqıqbuzar  tárepinen  oǵan 
járiyma salıw haqqındaǵı qarar tapsırılǵan kúnnen baslap on bes kúnnen 
keshiktirmey, bunday qarar boyınsha arız berilgen yamasa protest bildir-

---

51
gen  jaǵdayda — arız  yamasa  protest  qanaatlandıršlmaǵanlıǵı  haqqında 
xabar berilgen kúnnen baslap on bes kúnnen keshiktirmey tóleniwi tiyis.
Arnawlı avtomatlastıršlǵan foto hám video jazıw texnika quralları ar-
qalı jazılǵan jol háreketi qaǵıydaların buzǵanlıq ushın salınǵan járiymanı 
huqıqbuzar  járiyma  salıw  haqqındaǵı  qarar  shıǵarılǵan  kúnnen  baslap 
alpıs  kúnnen  keshiktirmey,  bunday  qarar  boyınsha  arız  berilgen  yama-
sa protest bildirilgen jaǵdayda bolsa, arız yamasa protest qanaatlandıršl-
maǵanlıǵı  haqqında  xabar  berilgen  kúnnen  baslap  otız  kúnnen  keshik-
tirmey tólewi tiyis.
On  altı  jastan  on  segiz  jasqa  shekem  bolǵan  shaxslardıń  óz  aldšna  is 
haqı bolmaǵan jaǵdayda, járiyma olardıń ata-anaları yamasa olardıń or-
nın basıwshı shaxslardan óndirip alınadı.
Hákimshilik huqıqbuzarlıq islegenlik ushın salınǵan járiyma huqıqbu-
zar  tárepinen  tiyisli  bank  mákemesine  tólenedi,  huqıqbuzarlıq  islegen 
jerdiń ózinde óndirip alınatuǵın járiyma buǵan kirmeydi.
Hákimshilik huqıqbuzarlıq islew quralı yamasa tikkeley  sonday nárse 
bolǵan  zattı  alıp  qoyıw  haqqındaǵı  qarar  Ózbekistan  Respublikası  Ádil-
lik  ministrligi  janındaǵı  Sud  qararların   orınlaw,  sudlar  xızmetin  mate-
riallıq-texnikalıq  jaqtan  hám  qarjılay  támiyinlew  departamenti  organları 
sud orınlawshıları tárepinen orınlanadı.
Transport  quralların  aydawshılar  hám  ań  awlaw  qaǵıydaların  buzǵan 
shaxslar  arnawlı  huqıqtan  ayırıw  haqqında  qarar  shıǵarılǵan  kúnnen 
baslap sonday huqıqtan ayırılǵan dep esaplanadı.

---