Узлуксиз малака ошириш тизимини янада такомиллаштиришнинг ташкилий механизми

Мақоланинг мақсади:
Узлуксиз малака ошириш тизимини янада такомиллаштириш механизмини очиб бериш, малака ошириш жараёнини автоматлаштириш босқичларини кўрсатиб ўтиш, масофавий малака ошириш ва мустақил ўқиб билим орттириш жараёнини мониторинг қилиш ва самарадорлигини баҳолаб бориш орқали интелектуал ва инновацион потенциали юқори кадрларни етиштиришни йўлга қўйишдан иборат.
Мақоланинг илмий моҳияти:
1. Ислоҳотларнинг чуқур ва самарали кечишини таъминловчи омил сифатида инсон капитали моҳияти очиб берилган;
2. Ишлаб чиқилган босқичлар барча малака ошириш тизимларига қўллаш учун универсал ҳисобланади;
3. Малака ошириш жараёнини мониторинг қилиш ва самарадорлигини баҳолашнинг муҳим жиҳатлари ёритилган.

Жаҳон илмий-техник тараққиётининг жадаллашуви, ишлаб чиқариш ва хизматлар кўрсатиш бозоридаги кескин рақобат корхона ва ташкилотлар ўз ходимларининг малакасини мунтазам ошириб боришини тақазо этади.

Молиявий, вақт ва инсон ресурслари чекланганлиги сабабли кўпчилик раҳбарлар корхона ва ташкилотларнинг сарф-харажатларини камайтиришни ўз ходимларининг малакасини ошириш жараёнига бериладиган молияни қисқартириш орқали эришишни хоҳлайдилар. Шу сабабли, йирик корхона ва ташкилотлар ходимларининг ўз вақтида малакасини оширишнинг самарали ҳамда кам сарф-харажат, вақт ва инсон ресурси талаб қиладиган механизмларини жорий этиши мақсадга мувофиқ.
Анъанавий малака ошириш тизими бевосита таълим жараёнига оид ўқув ва тарқатма материаллар, тақдимотлар, видео ва аудио материаллар, ўқув сифатини яхшилаш ва назорат қилишга мўлжалланган сўровномалар, даслабки ва якуний тест синовлари маълумотларини сақлаш ва уларни қайта ишлашда катта харажат, кўплаб инсон ва вақт ресурсларини талаб этганлиги сабабли корхона ва ташкилотларининг молиявий, вақт ва инсон ресурслари билан боғлиқ муаммоларни ҳал этишда самарали ечим бўла олмайди.
Ахборот-коммуникация технологияларини самарали жорий этиш асосида малака ошириш жараёнини бошқариш, ушбу муаммонинг энг мақбул ечими сифатида қараш мумкин⁴.