Ўқув қулланма Тошкент 2011 йил

1.4.2. WiMAX технологиясининг яқин йиллардаги ривожланиш истиқболлари

Ҳозирги кунда асосан IEEE 802.16.2004 ва IEEE 802.16e версиялари орқали маълум бўлган WiMAX стандарти кабелли тармоқлар даражасидаги юқори ўтказиш қобилиятини ва катта радиусли ҳудудда кенг полосали уланишни таъминлайдиган симсиз алоқа технологиясидир. WiMAX жиҳозлари 2 – 11 GGs диапазонида 10MGs кенгликдаги бир нечта каналларда ишлайди. Турли давлатларда частоталарнинг ўзига хос тарзда тақсимланиши WiMAX технологиясидан ҳар хил диапазонларда ишлаш имконияти заруратини тақозо этади. Масалан, WiMAX учун Шимолий Америкада 2,5GGs ва 5GGs диапазонлари, Марказий ва Жанубий Америкада 2,5GGs; 3,5GGs ва 5GGs диапазонлари, Яқин Шарқ, Африка, Ғарбий ва Шарқий Европада 3,5GGs ва 5GGs диапазонлари, Осиё ва Тинч океан регионида эса 2,3GGs; 3,5GGs ва 5GGs диапазонларидаги частоталар ишлатилиши кўзда тутилган.
Реал тизимларда IEEE 802.16 стандартининг барча режимлари ва имкониятлари ҳали ўз ифодасини топмаган бўлса-да, янги технология ишламоқда ва ривожланмоқда. IEEE 802.16 стандартидаги OFDMA TDD режимини симсиз алоқа глобал стандартлари - IMT-2000 (IMT-2000 OFDMA TDD WMAN) таркибига киритиш ҳақидаги ҲТИ нинг 2007 йилнинг 19 октябридаги қарори бунинг тасдиғидир [7]. Шуни ёддан чиқармаслик керакки, WiMAX фақат технология сифатидагина эмас, балки ахборот фазосини қуришдаги янги ёндашув сифатида ҳам эътироф этилади. Аммо бу технологиянинг келгусида қанчалик муваффақиятли бўлишини мобил алоқанинг истиқболли стандартлари (хусусан, LTE ва LTE Advanced стандартлари) билан рақобат белгилайди ва буни вақт кўрсатади. Ҳозирча WiMAX тармоқлари ўз ривожини давом эттирмоқда, IEEE 802.16 стандартлари ҳам бир жойда турмаяпти. Хусусан, яратилиш ва муҳокама этиш босқичида қатор янги тўлдиришлар турибди. Айни пайтда тизимнинг маълумот алмашиш тезлигини ошириш (100Mbit/sek дан юқори), спектрал самарадорлигини ва алоқа сифатини кўтариш, янги мобиллик (ҳаракат) даражаларини киритиш ва фойдаланувчиларнинг катта гуруҳларини самарали қўллаб-қувватлашни таъминлайдиган янги радиоинтерфейсни кўзда тутган IEEE 802.16m лойиҳаси фаол муҳокама қилинмоқда. Шу билан бирга, IEEE 802.16 Rev2 стандартининг аниқлаштирилган версиясининг пайдо бўлиши ҳам кутилмоқда. Бу версияга кўп оралиқли реле тармоқлари бўйича тўлдиришлар (802.16j) ва бошқа қатор ҳужжатлар киради [8].