Қурилиш меъёрлари ва қоидалари зилзилавий ҳудудларда қурилиш

МУҲАРИРЛАР: Б.С.Содиков (ЎзР Қурилиш вазирлиги), Ш.А.Хакимов («ToshuyjoyLITI» АЖ), М.Н.Убайдуллоев (СамДАҚИ), Т.Р.Рашидов (ЎзР ФА МИСМИ), Р.Р.Кадыров («ToshuyjoyLITI» АЖ).


ЎзР Қурилиш вазирлиги техник маъёрларни ва янги технологиялар жорий этиши бошқармаси томонидан ТАСДИҚЛАШ УЧУН ТАЙЁРЛАНДИ (Д.А.Ахмедов).

ҚМҚ 2.01.03-19 “Зилзилавий ҳудудларда қурилиш” амалга киритилиши билан ҚМҚ 2.01.03-96 Ўзбекистон Республикаси ҳудудида ўз кучини йўқотади.

Мазкур қурилиш меъёрлари ва қоидалари Ўзбекистон Республикаси Қурилиш вазирлигининг рухсатисиз тўла ёки қисман кўчирилиши, кўпайтирилиши ва расмий нашр сифатида тарқатилиши мумкин эмас.

Ўзбекистон Республикаси Қурилиш вазирлиги	Қурилиш меъёрлари ва қоидалари	ҚМҚ 2.01.03-19
	Зилзилавий ҳудудларда қурилиш	ҚМҚ 2.01.03-96 ўрнига

1. АСОСИЙ ҚОИДАЛАР
1.1. Мазкур меъёрлар ҳисобий сейсмиклиги 7,8,9 балл ва ундан юқори бўлган ҳудудларда жойлашадиган ва барпо этишга мўлжалланадиган бино (иншоот)ларни қуриш, реконструкциялаш, кучайтириш ва таъмирлаш жараёнига оид лойиҳа ҳужжатларини ишлаб чиқишда риоя этилиши лозим бўлган талабларни белгилайди.
Сейсмиклиги 9 баллдан юқори бўлган ҳудудлар икки турга ажратилади:
- >9 балли ҳудудлар (1.1-жадвалга кўра, сейсмиклик хоссаси бўйича грунти III тоифага мансуб бўлган 9 балли зоналар);
- 9* балли ҳудудлар (7,1 ва ундан юқори магнитудали зилзила манбаи ҳосил бўлиш эҳтимоли бўлган (ЗМЭБ) зоналар).
Буюртмачи томонидан тасдиқланган ҳамда архитектура, шаҳарсозлик ва қурилиш ишлари бўйича Давлат идоралари билан мувофиқлаштирилган Махсус ишлаб чиқилган техник шартлар асосида, шикастланишлар зилзила таъсирларидан хавфли экологик ва (ёки) ижтимоий оқибатларни вужудга келтириши мумкин бўлган объектларни лойиҳалашга рухсат этилади.
Мазкур меъёр талаблари транспорт ва гидротехник иншоотлари ҳамда атом электр станцияларни лойиҳалашга тадбиқ этилмайди.
Шунингдек, ушбу меъёрлар қуйидаги объектларни лойиҳалаш ва қурилишига ҳам тадбиқ қилинмайди:
а) ер сиртида тектоник бузилишлар вужудга келиш эҳтимоли мавжуд участкаларда жойлашса;

«ToshuyjoyLITI» АЖ томонидан тақдим этилган

Ўзбекистон Республикаси Қурилиш вазирлигининг 23.12.2019 й., 561-сон буйруғи билан тасдиқланган

Амалда жорий этиш муддати 1 март 2020 йил

б) габарит ўлчамлари, ҳажм-тарҳий ва конструктив ечимлари мазкур меъёр қоидаларга мос келмаса;
в) тарҳда ва баландлиги бўйича ҳаддан ташқари (2.12-жадвалда рухсат этиладиган қийматларга нисбатан) номунтазам конструктив тизимларга эга бўлса;


г) янги конструктив тизимлар, техник ечимлар, конструкциялар ва улар орасидаги боғланиш (бирикма)лар, материаллар ва махсус сейсмоҳимояли тизимлар мавжуд бўлган ҳолларда.
Юқорида санаб ўтилган объектларни лойиҳалаш ва қуриш – архитектура, шаҳарсозлик ва қурилиши ишлари бўйича Давлат идораси ваколатлаган махсус илмий-тадқиқот ташкилотлари томонидан ишлаб чиқилган махсус техник шартлар асосида амалга оширилиши керак. Махсус техник шартларга изоҳ “Атамалар ва таърифлар” бўлимида келтирилган.
Мазкур меъёрларга қўшимча равишда ишлаб чиқиладиган ҳужжатлардаги ҳолатлар (ҳудудий қурилиш меъёрлари, қўлланмалар, тавсиялар, стандартлар, техник шартлар) ушбу меъёр қоидаларига зид бўлмаслиги, истисно тариқасида киритиладиган қўшимчалар тегишлича асосланиши ва текширилиши лозим.
Архитектура, шаҳарсозлик ва қурилиши ишлари бўйича Давлат идораси билан мувофиқлаштирилган махсус ҳолатлар учун, бино ва иншоотларни сейсмик таъсирларга лойиҳалашда (қурилмалаш ва ҳисоблаш) хорижий меъёрлардан фойдаланишга рухсат этилади, шу вақтнинг ўзида мазкур меъёрни ҳам ҳисобга олиш керак. Айни пайтда, бино ёки иншоот лойиҳасининг сейсмик хавфсизлик қисмини мослаштиришга асос - ушбу бино учун миллий ихтисослаштирилган илмий-тадқиқот ташкилотлари томонидан ишлаб чиқилган махсус техник шарт талабларининг бажарилиши ҳисобланади.
1.2. Сейсмик фаол ҳудудларда қуриладиган бинолар (иншоотлар) ҳисобий эксплуатация муддати давомида зилзилабардошлик талабларига жавоб бериши зарур:
- ҳисобий интенсивликдаги зилзилада одамларнинг бинолардаги хавфсизлиги, конструкциялар ва қимматбаҳо асбоб-ускуналар бутлиги, шунингдек, объектлар шикастланишлари, ўз навбатида, атроф-муҳитнинг ифлосланиши ва аҳоли учун хавф туғдирмаслигини таъминлаш;
- ҳисобий интенсивликка нисбатан кичикроқ зилзилалар содир бўлганда, биноларнинг нормал эксплуатация режимини, конструкцияларнинг таъмирбоплигини таъминлаш;
- сейсмик таъсирлардан прогрессив қулаш хавфини камайтиришни кафолатлаш.
1.3. Бино (иншоот) лар зилзилабардошлигини таъминлашга қаратилган қуйидаги тадбирлар мажмуаси бажарилиши керак:
а) сейсмик юкларни камайтириш;
б) сейсмик таъсирларга қаршилигини ошириш.
Сейсмик юкларни камайтириш учун:
- содир бўлиши мумкин бўлган зилзилаларнинг спектрал-вақт тавсифига боғлиқ ҳолда, сейсмик юкларнинг энг кичик қийматига мос конструктив схемаларни қўллаш;
- масса ва бикирлик марказлари орасидаги эксцентриситетни кичрайтириш эвазига, буровчи тебранишларнинг вужудга келиш эҳтимолини камайтириш;
- минимал вазнга эга енгил материаллар ва конструкцияларни қўллаш;
- оғир жиҳозларни имкон борича иншоотнинг баландлиги бўйлаб пастки сатҳларда жойлаштириш керак.
Сейсмик таъсирларга қаршилигини ошириш учун:
- сейсмик юкларга юқори қаршилик кўрсата оладиган материаллар ва конструкциялар (металл, ёғоч, темирбетон, кучайтирилган тош-ғишт терими) дан фойдаланиш;
- сейсмик юкларни барча юк кўтарувчи элементларга узатилишини таъминлаш орқали, иншоотни ягона фазовий тизим сифатида ишлаши учун шароит яратиш;
- йиғма элементларнинг туташиш жойларини максимал зўриқишлар зонасидан узоқроқда жойлаштириб, бутун тизимнинг яхлитлиги ва бир жинслилигини таъминлаш;
- зўриқишларнинг элементлараро тақсимланишини таъминлайдиган ва аниқ белгиланган элементларда рухсат этилган ноэластик деформацияларнинг ривожланишига шароит яратувчи кўп марта статик ноаниқ конструкциялар афзал ҳисобланади;
- тарҳда вертикал конструкцияларнинг бир жинслилиги, симметриклиги, мунтазамлиги ва бир текис тақсимланиши, баландлик бўйлаб узлуксизлигини таъминлаш;
- тарҳда ва баландлик бўйича массанинг текис тақсимланишини таъминлаш;
- ягона конструктив тизим каби сейсмик таъсирларга биноларнинг ораёпмалари ва уларнинг реакциялари диафрагма сифатида ишлашини таъминлаш;
- асосий горизонтал йўналишларда конструктив тизимнинг бир-бирига яқин бўлган бикирлик ва қаршиликларини таъминлаш;
- турли йўналишда сейсмик таъсирларга қаршилик кўрсатадиган конструктив схемаларни танлаш, сейсмик таъсирларга масса ва бикирликлар орасидаги эксцентристетни кичрайтириш эвазига, буровчи тебранишларнинг пайдо бўлиш эҳтимолини камайтириш;
- бино ёки иншоотнинг қулашига олиб келувчи маҳаллий бузилиши ёки рухсат этилмаган деформацияланиши натижасида юк кўтарувчи конструкцияларнинг бутлигини таъминловчи тадбирларни кўриш;
- конструкцияларнинг пластик деформацияланиш қобилиятини таъминловчи чора-тадбирларни амалга ошириш;
- конструкциялар ва (ёки) улар орасидаги бирикиш жойларда пластик деформациялар ривожланиши туфайли, конструктив тизимларнинг устуворлиги ва геометрик ўзгармаслигини таъминлаш;
- шикастланиши инсонлар хавфсизлиги учун таҳдид туғдириши мумкин ёки уларни бартараф этиш учун катта сарф-ҳаражатларни талаб этадиган юк кўтармайдиган конструкцияларнинг бутлигини таъминловчи чора-тадбирлар ишланиши керак.
Бино (иншоот)лар ва уларнинг алоҳида элементлари - қурилишга оид бошқа меъёрий ҳужжатлар таркибидаги талабларни ҳам қониқтириши лозим (агар мазкур меъёрларда изоҳ ёки шарҳ киритилмаган бўлса).
Бино ва иншоотларни лойиҳалаш – конструкцияларни ҳисоблаш ва синаш натижаларининг комбинациясига асосланиши мумкин. Синаш натижаларига асосланиб лойиҳалаш – ҳисобий сейсмик ҳолатга мос келувчи муайян лойиҳаланадиган бино (иншоот)ларнинг ишончлилик даражасини таъминлаши шарт.