Umumiy va noorganik kimyo

XAVFSIZLIK TEXNIKASI VA ISH O`RNINI JIHOZLASH.

Kimyo laboratoriyasida ishlaganda ko’ngilsiz hodisalar ro’y bermasligi uchun quyidagi ehtiyot choralari qoidalariga amal qilinishi qat’iyan talab etiladi:

1. 
   E’tiborsizlik, pala-partish ishlash, asboblar bilan yaqindan tanish bo’lmaslik, kislota va ishqorlarning xossalarini hamda xavfsizlik texnikasi qoidalarini yaxshi bilmaslik ko`ngilsiz hodisalarga sabab bo`lishini har bir talaba uqib olishi zarur.
   
2. 
   Laboratoriya ishlari bajariladigan asosiy joy ish stoli doimo toza bo`lishi kerak. Ishlayotganda shoshilmasdan, reaktivlarni to`kmasdan va sachratmasdan ishlash lozim.
   
3. 
   Ish vaqtida konsentrlangan kislota yoki ishqorlar to`kilgan joyni ehtiyot bo`lib tezda artish, suv bilan yuvish so`ngra, kislota to`kilgan joyni soda eritmasi bilan, ishqor to`kilgan joyni esa sirka kislotasining 5% li eritmasi bilan neytrallash kerak, chunki bu moddalar stol va boshqa buyumlarni ishdan chiqaradi.
   
4. 
   Reaktiv solingan probirkalarni bir shtativdan ikkinchi shtativga olmang va probirkalarda turgan tomchi pipetkalarni bir probirkadan ikkinchi probirkaga solmang, chunki bunda ham ish tartibi buziladi, ham reaktivlar ifloslanadi.
   
5. 
   Umumiy foydalanish uchun quyilgan reaktiv va asboblarni turgan joyidan o`z stolingizga olib bormang.
   
6. 
   Shisha sinig`i, qog`oz, gugurt cho`pi, ishlatilgan reaktivlarni va shunga o`xshash moddalarni rakovinaga tashlamasdan, rakovina tagiga qo`yilgan maxsus idishga tashlang. Shuningdek, ishlatilgan eritma va cho`kmalarni ham stol ustiga qo`yilgan maxsus idishga quying.
   
7. 
   Metallarni tejash uchun, reaksiyaga kirishmay qolgan metall bo`lakchalarini suv bilan yuvib maxsus qo`yilgan idishga yig`ish kerak.
   
8. 
   Ortib qolgan reaktivni shu reaktiv olingan idishga qaytarib solmang.
   
9. 
   Reaktivni pipetka bilan olsangiz, pipetkani yuvmay turib, u bilan boshqa idishdan reaktiv olmang.
   
10. 
    Ajralib chiqayotgan gazlarni yaqin turib hidlamang. Gazni hidlash lozim bo’lgan taqdirda, havoni qo’lingiz bilan idish og’zidan o’zingiz tomon yelpib ohista hidlang.
    
11. 
    Elektr asboblari bilan ishlashda ularning yaxshi izolyatsiyalangan bo’lishiga e’tibor bering.
    
12. 
    Tartib va ozodalikka e’tibor bering.
    
13. 
    Laboratoriya mashg’uloti tugagach, ish stollarini tartibga soling. Reaktivlarni maxsus belgilangan joylarga qo’yib, ish joyingizni laborantga topshiring.