Ҳудудлар ривожланишини давлат томонидан тартибга солиш

Ҳудудларни ривожлантириш концепцияси ва стратегияларини ишлаб чиқиш ва амалга ошириш.
Мазкур дастак стратегик режалаштиришнинг муҳим воситаси ҳисобланиб, ҳудудларни узоқ муддатли стратегик тасаввурлар, устувор йўналишлар, мақсадли кўрсаткичларни белгилаш ва шу орқали комплекс ижтимоий-иқтисодий ривожланишини бошқариш ва тартибга солишга йўналтирилган. Мамлакатимизда ислоҳот йилларининг дастлабки босқичида узоқ муддатга мўлжалланган ҳудудий концепция ва стратегиялар ишлаб чиқишга деярли эътибор қаратилмади. Айрим ҳудудларни (Қорақалпоғистон Республикаси, Андижон, Сурхондарё, Қашқадарё, Хоразм, Тошкент вилоятлари) ижтимоий-иқтисодий ривожлантириш стратегиялари Прогнозлаштириш ва макроиқтисодий тадқиқотлар институти томонидан хорижий ташкилотлар ҳамкорлигида ва бошқа ҳамкорлар иштирокида ишлаб чиқилди. Бироқ, улар ҳуқуқий ҳужжат шаклида қабул қилинмади. Ислоҳотларнинг янги босқичида ҳудудий сиёсатга давлат сиёсати сифатида қаралаётгани натижасида ҳудудларни комплекс ижтимоий-иқтисодий ривожлантириш концепцияси ва стратегияларини ишлаб чиқиш жадаллашди. Бундан ташқари, инвестиция дастурларини шакллантиришда, биринчи навбатда, ҳудудни ривожлантириш концепциясига кирган лойиҳаларни инобатга олиш вазифаси қўйилди¹⁰. Ҳудудларни узоқ муддатли ривожлантириш концепция ва стратегияларининг мавжудлиги қуйидагиларга кенг имкониятлар яратади:
- туман ва шаҳарларнинг ривожланиш тенденциялари аниқланади, улар иқтисодиётининг устунлик, камчилик, имкониялари ва хавф-хатарлари, табиий-иқтисодий салоҳияти, вилоятнинг мамлакат иқтисодиётидаги ўрни ва ҳолати баҳоланади;
- хорижий инвестициялар ҳамда халқаро грантларни ҳудуд иқтисодиётига кенг жалб қилишни жадаллаштиради;
- давлат ва хусусий сектор вакилларида ҳудуд иқтисодиёти ҳолати, салоҳияти ва келажаги тўғрисида умумий тасаввур пайдо бўлади;
- республика даражасида ва ташкилотлари томонидан амалга ошириладиган лойиҳалар, чора-тадбирларни танлашга асос яратилади;
- ҳудуд иқтисодиётини бошқариш, ижтимоий-иқтисодий ва мутаносиб ривожланишини тартибга солиш, ҳудудий сиёсатни амалга оширишда муҳим восита бўлиб хизмат қилади ва бошқалар.