Udk 800 mahkamova (sodiqova) sayyora saida zunnunova ijodining o’ziga xosligi

Mavzu bo’yicha qisqacha adabiyotlar tahlili. Saida Zunnunova ijodini monografik planda tekshirgan H.Hasanovaning tadqiqotida shoira hayoti va ijodi umumiy tarzda o’rganigan. N.Rahimjonovning lirik dostonchilik taraqqiyotini o’rganishga bag’ishlangan nomzodlik, Sh.Hasanovning doston poetikasi masalalari tekshirilgan doktorlik dissertatsiyasida "Ruh bilan suhbat" dostoni haqida mulohazalar bildirilgan. Shuningdek, shoira ijodini o’rganishda munaqqid I.G’afurovning bir qator maqola, so’zboshi va takrizlari, U.Normatov, S.Mamajonov, N.Rahimjonov va boshqa adabiyotshunoslar tomonidan turli yillarda e’lon qilingan maqolalardagi fikrlar qimmatlidir.
Tadqiqotga Saida Zunnunovaning she’riy va liro-epik asarlari tadqiqot manbai sifatida olindi. Shuningdek, ijodining o’ziga xos xususiyatlarini yoritishga xizmat qiluvchi ayrim nasriy asarlari ham tahlilga tortildi. Saida Zunnunovaning 1976-1977,2001- yillarda nashr etilgan uch jildlik "Tanlangan asarlar" to’plamidan asosiy, turli yillarda shoira hayoti va ijodi haqida yaratilgan tadqiqot, risola va maqolalardan, XX asr o’zbek adabiyoti namoyandalarining asarlaridan yordamchi manba sifatida foydalanildi.
Tadqiqotda qo’llanilgan uslublarning qisqacha tavsifi. Dissertatsiyani tayyorlashda falsafa va mantiqning borliqni bilishning umumiy qonuniyatlariga, adabiyotshunoslikning shu davrgacha erishgan yutuqlariga, Istiqlol mafkurasi tamoyillariga tayanildi. Adabiyot nazariyasining yetuk tadqiqotchilari, adabiyotshunoslar B.Nazarov, M.Qo’shjonov, U.Normatov, N.Karimov, A.Rasulov, D.Quronov, Q.Yo’ldoshev, B.Karimovlarning ilmiy-nazariy tahlillari, xulosalariga asoslanildi. Tadqiqot ishida biografik, psixologik, sotsial, germenevtik tahlillar qo’llanildi.
Tadqiqotning nazariy va amaliy ahamiyati. Tadqiqotning nazariy ahamiyati shundaki, o’zbek adabiyoshunosligida istiqlol mavzusining o’zagi bo’lmish milliylik, xalqchilik kabi qarashlarga aniqlik kiritadi. Tadqiqot ishidagi ilgari surilgan fikrlar va xulosalar muhim ahamiyat kasb etadi. Mazkur tadqiqot ishining material va xulosalaridan:

• 
  kollej va litseylarda maxsus kurs va maxsus seminar o’tkazishda;
  
• 
  o’rta maktab darsliklariga yordamchi material sifatida foydalanishda;
  
• 
  oliy o’quv yurti filologiya fakultetidagi to’garaklarda ma’ruza qilishida;
  
• 
  ma’naviyat va ma’rifat masalalarini o’rganish hamda targ’ib etilishida;
  
• 
  lirik qahramon va sadoqatli ayol muammosini ayollar orasida tashviqot qilishda;
  
• 
  milliy istiqlol g’oyalarini o’rganishda foydalanish mumkin.