Транспорт воситалари таснифи Автомобиллар ўлчами ва масса кўрсаткичларининг жоиз чегаралари

Транспорт воситалари таснифи

Транспорт воситалари бажарадиган вазифаларига кўра уч гуруҳга бўлинади: юк автомобиллари, пассажир автомобиллари ва махсус автомобиллар.

Давлат стандартига биноан умум фойдаланиш йўлларида ишлатишга мўлжалланган автомобиллар икки А ва Б гуруҳга бўлинади. А гуруҳдаги автомобил ва автопоездлар учун бир ўқдан йўлга тушувчи энг кўп оғирлик 100 кН дан ортиқ бўлмаслиги лозим. Бунда ёнма-ён ўқлар орасидаги масофа камида 2,5 м бўлади. Бундай автомобиллар йўл қопламаси капитал ва такомиллаштирилган I ва II техник категорияли йўллардагина ишлатилади. Бун­дай йўл қопламалари цемент ёки асфальт-бетондан тайёрланади. Б гуруҳдаги автомобил ва автопоездлар учун бир ўқдан йўлга тушувчи энг кўп масса оғирлиги 60 кН дан ортмаслиги керак. Бунда хам ёнма-ён уклар орасидаги ма­софа камида 2,5 м булади. Бундай автомобиллар умум фойдаланиладиган барча техник категорияли йўлларда хам ишлатилиши мумкин.
Йўлга тушувчи масса оғирлигининг давлат стандарти билан чегараланган миқдордан ортиқ бўлиши, амалда йўл ва кўприклар конструктив элементларида деформация қолдиғи бўлиши ҳисобига уларнинг тез бузилиши ва белгиланган вақтдан олдин ишдан чиқишига олиб келади. Барча хорижий давлатларда хам автомобил йўлларининг белгиланган муддатдан илгари бузилмаслиги учун йўл қопламасига тушувчи масса оғирликлари чегараланган. Кўпчилик Оврупо ва Америка давлатларида автомобилларни А ва Б гуруҳларга бўлишнинг аниқ чегараси бўлмай, улар да магистрал (автострада) йўл қопламасига тушувчи масса оғирлиги ва транспорт воситаларининг умумий массаси қонун йўли билан чегаралангандир. Бундан ташқари йўллардаги баъзи чегаравий кўрсаткичлар йўл белгилари орқалигина берилади.
Ўқ массаси орқали йўл қопламасига тушувчи оғирлигига кўра учинчи гуруҳга мансуб автомобилларга умум фойдаланиш автомобил йўлларида ишлатилиши мумкин бўлмаган оғир массали автомобиллар киради. Бундай ав­томобиллар йўл қопламасидан катьий назар умум фойда­ланиш автомобил йўлларида ишлаши мумкин эмас. Бун­дай автомобилларда бир ўққа тушувчи оғирлик 100 кН (10 тк) дан ортиқ бўлади. Бундай автомобиллар гуруҳдаги таснифига кўра "йўллардан ташқари ёки карьер автомобиллари» номи билан юритилади. Бундай автомобиллар қаторига БелАЗ, Саtterfillar, Yuclid кабилар киради.
Барча автомобиллар, ўз навбатида юк ёки пассажирлар ташувчи транспорт автомобилларига ва транспорт автомобиллари бўлмаган махсус автомобилларга бўлинади. Махсус автомобилларга ўт учирувчи, коммунал хизмат (сув сепувчи, супурувчи, аҳлат ва бошқа чиқиндилар та­шувчи ва ҳ.к.) этувчи, автокранлар, санитария автомобил­лари, тиббий тез ёрдам автомобиллари, техник ёрдам ва устига устахона ўрнатилган, спорт автомобиллари ва шу кабилар киради.
Транспорт автомобил ва автопоездлари ўз навбатида юк ва пассажир ташувчи хилларга бўлинади. Пассажир автомобиллар автобус ва енгил автомобилларга бўлина­ди. Юк ташувчи, автобус ва енгил автомобиллар ўз кон­структив схемаларига биноан яна бўлинадилар. Юк ав­томобиллари ўз навбатида бир бўғинли автомобилларга ва икки ва ундан ортиқ бўғинли автопоездларга бўлина­ди. Автопоездлар автомобил-тягач тиркама ёки эгарли ярим тиркамали бўлишлари мумкин.
Олдинги даврларда бир бўғинли ва икки (ундан хам ортиқ) бўғинли автопоездлар учун қуввати юқори авто­мобиллар яратилган бўлса, хозирги кунда бундай авто­мобиллар оқилона ҳисобланмайди. Хозирги давр жадал ва кўпинча поток транспорт харакатидаги барча харакатланувчи транспорт бирикмалари тўлиқ массаларидан катъий назар бир хил тортув-тезлик хусусиятли, тезланиш ва тормозланиши бир хил бўлиши тақазо этилади. Бунинг учун транспорт бирикмалари тулиқ массаларига мос келувчи двигател қувватларига эга бўлиши лозим. Бун­дай қувватга эга бўлмаган тақдирда йўл ўтказиш хусусиятидан тўла фойдаланиб бўлмайди. Шунинг учун бир бўғинли автомобиллар двигателининг қуввати автопоездларникига нисбатан кам бўлиши иқтисодий томондан ўзини оқлайди. Тягачли автомобиллар куч узатмаси ва тормоз механизмлари бир бўғинли автомобилларникидан жиддий фарқ қилиши лозим.
Эгарли тягач ва ярим тиркамали автопоездлар бизда ва чет давлатларда кенг қулланилади ва улардан анча самарали фойдаланилади.
Юк автомобилларини таснифлашнинг асосий йўналишларидан бири уларни ўлчамларига кўра градациялашдир. Юк автомобиллари учун бундай ўлчамлар қаторига, энг аввало, юк кўтарувчанлик ёки улар масса оғирлигини киритиш мумкин. Транспорт истеъмолчилари ва транспорт ходимлари учун автомобилларнинг юк кўтарувчанлиги купроқ аҳамиятга эга. Бу кўрсаткич автомобилларнинг ташувчанлик хусусиятини кўрсатади. Хозирги кунда бизда ва МДХ га аъзо бошқа давлатларда юк кўтарувчанлигига кўра юк автомобиллари беш гуруҳга бўлинади. Юк кўта­рувчанлиги 0,5 т гача бўлган жуда кам юк кўтарувчи автомобиллар (енгил автомобил шассисида яратилган); юк кўтарувчанлиги 0,5 т дан 2,0 т гача бўлган кам юк кўтарувчи автомобиллар; 2,0 т дан 5,0 т гача ўртача юк кўтарувчи автомобиллар; юк кўтарувчанлиги 5,0 т ва ундан катта; бир ўққа 100 кН (10 тк) ва жуфт ўқларга эса 180 кН (18тк) дан ортиқ юк ташувчи автомобиллар киради.
Юк кўтарувчанлиги кичик (2,0 т гача) автомобиллар юк обороти катта бўлмаган кичик хўжалик фирмалари, савдо ташкилотлари, мактаб ошхоналари ва шу каби ташкилотлар хамда якка қишлоқ хўжаликлари фирмаларига хизмат кўрсатиш учун зарурдир.
Ўртача юк кўтарувчанликка (2,0 т дан 5,0 т гача) эга автомобиллар саноат, қишлоқ хўжалиги объектлари, қурилиш ва шу каби бошқа ташкилотларнинг оғирроқ ишларини ташиш учун хизмат қилади.
Юк кўтарувчанлиги катта (5,0 т дан ортиқ) автомо­биллар қуввати катта ва мунтазам юк оқимларини қаттиқ қопламали магистрал йўлларда қаноатлантириш учун хизмат қилади. Кейинги йилларда бундай автомобиллардан шахар ва йирик аҳоли пунктларида хам юкларни ташишда, тоғ-руда саноати хамда йирик саноат корхоналари юкларини ташишда кенг фойдаланилмоқда.
Ривожланган хорижий давлатларда юк автомобилла­ри ўлчамлари мезони сифатида уларнинг тулиқ масса оғирлиги қўлланилади. Бунинг асосий сабаби хар хил ихтисослаштирилган, кузов массалари хам хар хил бўлган автомобиллардан кенг фойдаланишдир.
Узоқ манзилларга, яъни шахар (вилоят)лараро хамда давлатлараро юк оқимларини таъминлашда кўп юк кўтара олувчи автопоездлардан фойдаланилади. Бундай автопоездлар конструкцияси ўз тортиш-тезлик хусусиятларига кўра бир-биридан фарқ қилади. Масалан, улар кабинасида ухлаб хордиқ чиқариш жойлари хам бўлиши мумкин. Шунинг учун хам уларни таснифлашда алоҳида хусусиятларни ҳисобга олувчи талаблар назарда тутилган. Барча юк ташувчи автомобиллар икки гуруҳга бўлинади: универ­сал вазифали, бортли кузовга эга, хамда ихтисослаштирилган кузовли, яъни уларнинг конструкцияси аниқ бир ёки бир неча хил юк ташишга мўлжалланган. Ихтисослаштирилган кузовли автомобиллар универсал кузовли автомобилларга нисбатан ташилувчи юклар сифатини юқори даражада сақлаб бориши билан якқол ажралиб туради. Бун­дай автомобиллар ортиш-тушириш жараёнларини енгиллаштириш ва уларни бажаришга сарфланадиган вақтни қисқартириш имкониятига эга. Асосий ва кенг фойдаланадиган ихтисолаштирилган автомобиллар қаторига қуйидагилар: самосвал кузовли, фургон кузовли, цистернали, кон­тейнер, панел, ёғоч ва цемент ташишга мослаштирилган автомобиллар киради.
Аксарият автомобиллар кузовининг конструкциясига кўра универсал платформали хамда стандарт бортли умумтранспорт хар хил юклар ташувчи автомобиллардир. Бун­дай автомобиллар платформаси бортли ёки бортсиз қилиб ишланган бўлиши мумкин. Бортсиз платформали авто­мобилларнинг кузови оғир ва йирик габаритли, бўлинмайдиган юкларни ташишга мўлжалланган. Баъзи холларда хажми катта енгил юкларни ташишда автомобил­ларнинг кўтарувчанлигидан тўлиқ фойдаланиш максадида стандарт талабидан чиқмаган ҳолда уларнинг кузов бортларини баландлатишга рухсат берилади. Айрим юк­ларни ташишда уларни чанг ва ёғингарчиликдан сақлаш мақсадида кузовнинг усти тент билан ёпилиши хам мумкин. Баъзи фургон автомобиллар кузови қўлфланувчи эшикли бўлиши хам мумкин. Бундай автомобиллар юк­ларни ёғингарчилик ва чангдангина яхши сақлаб қолмай, атмосфера харорати таъсиридан хам сифатли сақлаб бо­риши мумкин. Сочилувчан ва уюб ташиладиган юклар учун автомобилнинг кузови ўзи ағдарадиган қилиб иш­ланган бўлиши хам мумкин.
Автобуслар конструктив схемасига кўра уч турга бўлиниши мумкин: якка салонли; бирлаштирилган салонли; автобус поездлари, яъни тиркамали автобуслар. Аксари­ят ҳолларда амалда якка салонли автобуслар қўлланилади. Бирлаштирилган (ёки ярим тиркамали) автобуслар пассажирлар оқими катта бўлган маршрутларда қўлланилиб, ўз маневрчанлигига кўра шахарлардаги йўл-кўчаларга кўпроқ мосланган бўлади. Пассажир ташувчи тиркамали автобус­лар харакат хавфсизлиги нуқтаи назаридан жуда кам ҳоллардагина қўлланилади.
Автобуслар габарит ўлчамлари ва стандарт талабига кўра бешта синфга бўлинади. Автобусларни эксплуата­ция қилувчилар нуқтаи назарича асосий ўлчам мезони автобус салонининг сиғдирувчанлиги, яъни унинг нечта пассажир сиғдира олиш кўрсаткичидир. Вазифаси ва ўриндиқлар миқдорига кўра узунлиги бир хил бўлган автобусларнинг номинал сиғдирувчанлиги турлича бўлиши мумкин (1-жадвал).
Бажарадиган вазифасига кўра автобуслар қуйидаги турларга бўлинади: шахар ичи, шахар атрофи, шахарлараро, саёҳат мақсадида фойдаланиладиган, қисқа масофага (қишлоқ туманлари ўртасида) қатновчи мактаб ўқувчилари учун, экскурсия ва вазифаси умумий бўлган автобуслар. Давлат стандартига биноан шахар ичи ва шахар атрофи автобуслари «шахар автобуслари» гуруҳига, шахарлараро, саёҳат, қисқа масофада (қишлоқ туманлари ўртасида) ишловчи автобус­лар узоқ масофаларга қатновчи автобуслар гуруҳига киритилади.
Хар бир пассажир учун амалдаги меъёрларга кўра кузовнинг пассажирлар салонининг таянч майдони хар бир ўтирувчи пассажир учун камида 0,315 м², хар бир туриб кетувчи пассажир учун камида 0,2 м² бўлиши лозим. Бундай меъёрларга кўра автобус салони планировкасидаги ўриндиқлар ва туриб кетувчи пассажирлар жойининг ўзаро нисбатларини ўзгартириш орқали турлича сиғимларга эга бўлиши мумкин.
Автобусларнинг тезлик ва тортиш хусусиятларини баҳолаш учун уларнинг максимал тезлиги ва бу максимал тезликка эришиш учун зарур бўлган вақт хамда йўлнинг энг катта қиялигини енга олиш кўрсаткичларидан фойдаланилади.
Автобуслар максимал тезлиги уларнинг вазифаси билан боғлиқдир катта харакат тезлиги зарур бўлмаган шахар ичи ёки шахар атрофи маршрутлари учун бу қиймат 60-80 кмҒсоат, шахарлараро қатновлар учун 100-120 кмҒсоат. Максимал тезликка эришиш учун сарфланган вақт қанча кичик бўлса, бошқа шароитлар бир хил бўлган тақдирда автобусларни эксплуатация қилиш кўрсаткичи шунча яхши ҳисобланади. Бироқ юқорида айтилган вақтнинг кичик бўлиши ёнилғи сарфини кўпайтиради ва автобусларга катта қувватли двигателлар ўрнатишни талаб қилади. Шуни ҳисобга олиб, тезланишга сарфланган вақтнинг энг катта оқилона миқдори шахар ичи автобуслари учун 40-55 сек, шахар атрофи автобуслари учун 50-65 сек ва шахарлараро автобуслар учун 70-90 секунд деб қабул этилган.

Тоғли жойларда ишловчи автобусларнинг имкониятини баҳолашда йўл қиялигини енга олиш хусусиятидан фойдаланилади. Агар автобус ўзининг узатишлар қутисидаги энг кичик узатма билан 30% ли ва энг катта узатмаси билан 3% ли йўл қиялигини бемалол енга олса, бундай автобус имконияти қониқарли ҳисобланади.

Автобусларнинг асосий кўрсаткичларидан бири уларнинг ёнилғи тежамкорлиги бўлиб, у хар 100 км масофага сарфланган ёнилғи миқдори билан ўлчанади. Бир хил сиғимли автобусларнинг ёнилғи сарфи улар конструкциясининг такомиллашганини кўрсатади. Баъзи ҳолларда, масалан, хар хил йўл шароитлари, маршрутдаги тўхтаб ўтиш жойлари миқдори ва бошқа омилларга кўра бир автобус учун ёнилғи сарфи хар хил бўлиши мумкин. Шунинг учун автобуслар учун йўл шароити ва маршрутлар хусусиятига биноан ёнилғи сарфининг ўртача меъёри белгиланади.
Шахарда қатновчи автобуслар конструкцияси, иложи борича, пассажирларнинг ўтириб ва туриб кетишига, уларнинг тўхташ жойларида тез чиқиш ва тушишига, тез-тез тўхтаб, катта тезланиш билан харакатланишга мосланган бўлиши лозим.
Шахар ичи маршрутларида қатновчи пассажирлар ўрта­ча қатнов масофаси нисбатан кичик (3-6 км) ва сутка давомида пассажирлар оқимининг ўзгарувчан бўлиши шахар ичи автобусларининг кузов салони планировкаси кам ўриндиқли, ўтиш жойлари, автобуснинг олд ва орқа томонида туриб кетишга мўлжалланган сатҳ (майдонча)нинг кенг бўлишини тақазо этади. Салонни айтилгандек планировкалаш пассажирларга хизмат этиш сифатини деярли камайтирмагани ҳолда автобус сиғимини оширади. Чиқиш ва тушиш эшиклари кенг бўлиши пассажирлар чиқиши ва тушиши учун зарур бўлган тўхтаб туриш вақтини камайтириш ҳисобига автобуслар иш унумини оши­ради. Енгил автомобиллар двигателининг иш хажми миқдори ва пассажирлар сонига кўра фарқланади. Двигателнинг иш хажми ўлчам мезони барча давлатларда автомобил учун тўланувчи солиқ миқдори учун асос қилиб олинган. Бу кўрсаткич спорт автомобилларини таснифлашда хам қўлланилади. Барча енгил автомобиллар ўз ўлчамларига кўра тўрт синфга бўлинади. Умум фойдаланиш автомобил транспорти соҳасида хизмат кўрсатувчи енгил автомобиллар, такси сифатида фойдаланиладиган, хамда корхона ва ташкилотларга хиз­мат кўрсатадиган автомобилларга, шунингдек, шахсий мулк эгаларининг енгил автомобилларига бўлинади.
Бажариш вазифаларига кўра енгил автомобил транс­порти воситаларига турлича талаблар қўйилади. Аҳолининг енгил такси автомобилларига бўлган эҳтиёжини ўрганиш шуни кўрсатадики, жами қатновларнинг 75 фоизида салонда бир ёки икки пассажир, 10-15 фоизида уч пас­сажир ва фақат 5-10 фоизида тўрт пассажир қатнар экан. Бундай автомобилларда махсус ҳисоблагич — таксометр, такси автомобили белгиси ва автомобилнинг банд ёки бўшлигини кўрсатувчи чироғи бўлиши зарур.
Енгил такси автомобилларининг 60 кмҒсоат тезликка етиши учун зарур вақт 10 сек. дан ортиқ бўлмаслиги ло­зим.
Автомобилларнинг юқорида келтирилган таснифи уларнинг эксплуатация хусусиятларига кўра тузилган. Автомобилларни конструкциясига қараб хам таснифлаш зарур. Масалан, юк автомобиллари компоновкаси (агрегатлари — двигателлари жойлашуви) га кўра улар: капотли, қисқа капотли ва капотсиз бўлиши мумкин. Автобус­лар хам капотли ёки вагон-салон компоновкали бўлиши мумкин. Автомобиллар узун ва қисқа базали, хар хил трансмиссияли ва хоказо турларда бўлиши мумкин. Автомобил двигатели унинг олд ёки орқа томонида, ёки кабина (автобусда кузов) тагига жойлаштирилган бўлиши мумкин. Двигателлар бензинда ёки дизел ёнилғида ишлаши мумкин.
Автомобилларнинг етакчи кўприги орқада ёки олдида жойлашиши, улар бир ва бир неча етакчи кўприкли бўлиши, шунингдек ғилдирак формуласига биноан хам ажратилиши мумкин.
Хар хил табииат-иқлим шароитларини ҳисобга олувчи махсус конструкцияли, масалан, шимолий (совуқ иқлим), жанубий (иссиқ иқлим) ва тропик иқлим ва бошқа шароитларига мосланган автомобиллар хам бўлади.