Тошкент вилояти чирчиқ давлат педагогика институти

Тадқиқотнинг республика фан ва технологиялари ривожланиши-нинг устувор йўналишларига мослиги. Мазкур тадқиқот республика фан ва технологиялари ривожланишининг I. “Ахборотлашган жамият ва демократик давлатни ижтимоий, ҳуқуқий, иқтисодий, маданий, маънавий-маърифий ривожлантиришда, инновацион ғоялар тизимини шакллантириш ва уларни амалга ошириш йўллари” устувор йўналиши доирасида бажарилган.
Муаммонинг ўрганилганлик даражаси. Мамлакатимизда тарбия тизими ва унда ёшларни маънавий-маърифий ва ватанпарварлик руҳида тарбиялаш технологиялари, ватанпарварликнинг намоён бўлиш шакллари, миллий ғоя ва маънавий тарғибот масалаларининг тадқиқи О.Мусурмонова, М.Қуронов, Т.Маҳмудов, О.Ҳасанбоева, С.Нишонова, Ш.Мардонов, Ш.Абдуллаева, О.Жамолиддинова, Р.Мавлонова, Н.Азизходжаева, У.Маҳкамов, С.Турғунов, Ш.Йўлдошев, У.Шерматова, Н.Усмонов каби педагог олимлар; муаммонинг фалсафий жиҳатлари Н.Жураев, Б.Қосимов, А.Ачилдиев, М.Тилаволдиева, Ш.Саламов, Х.Очилов, К.Туленов, Э.Юсупов каби файласуф олимлар томонидан амалга оширилган.
Мустақил давлатлар ҳамдўстлиги (МДҲ) малакатлари олимларидан А.К.Маркова, Г.И.Глебов, Б.Л.Фарберман, О.В.Милаева, М.М.Решетников, Ю.М.Бундина, В.Л.Иноземцев, А.И.Пригожин, В.Ж.Келле, С.Е.Крючкова, В.П.Беспалько, С.Р.Волковаларнинг тадқиқотларида глобаллашув ва унинг моҳияти, глобаллашув шароитида маънавий-маърифий ва ватанпарварлик тарбиясининг аҳамияти, ватанпарварлик ва миллий мафкурани тарғиб этиш технологиялари, тарбиянинг шакллари, таърифи ва тавсифи, маънавий-маърифий ва ватанпарварлик тарбиясининг педагогик жиҳатлари билан боғлиқ масалалар ўрганилган.
Хорижлик олимлардан Х.Г.Барнетт (H.G.Barnett), А.Ж.Бровн (A.J.Brown), К.Роджерс (K.Rodjers), К.С.Финдлий (C.S.Findlay), Л.Нефиодов (L.Nefiodow)ларнинг илмий изланишларида глобаллашув жараёнларида тамаддунлар тўқнашуви ва унинг оқибатларига қарши инновацион технологияларни ишлаб чиқиш, миллий маданият, қадрият ва анъаналарнинг ўзаро сингишиш жараёнлари, глобаллашув шароитида ватанпарварлик тарбиясини такомиллаштириш масалалари кенг ёритиб берилган.
Ўзбекистон Республикаси Президентларининг ёшлар масаласида билдирган илмий-сиёсий қарашлари, Янги Ўзбекистоннинг тараққиёт стратегияси борасида маҳаллий тадқиқотчилар ва халқаро экспертлар томонидан билдирилган концептуал аҳамиятга эга фикр-мулоҳазалар мазкур тадқиқот учун методологик асос бўлиб хизмат қилди. Ёшларни маънавий-маърифий ва ватанпарварлик руҳида тарбиялаш масаласининг глобаллашув шароити талабларидан келиб чиқиб алоҳида монографик планда ўрганишнинг зарурати мазкур тадқиқот мавзусини белгилаб берди.