Тошкент темир йўл муҳандислари институти «электр транспорти» кафедраси

Машинист кабинаси. Стандарт талабларига мувофиқ кабина бир вақтда уч киши жойлашиши учун ҳисобланган бўлиши керак: машинист, машинист ёрдамчиси ва машинист - инструктор. Электровозларнинг машинист кабиналари ўнг тараф бўйлаб ҳаракатланиш учун ҳисобланганлиги сабабли машинист иш жойи ўнг томонда, унинг ёрдамчисининг иш жойи эса чап томонда жойлаштирилган. Кабинада электровозни бошқариш жиҳозлари ўрнатилган (машинист контроллери, бошқарув занжирлари автоматлари блоки, сигнал индикаторлари, тормоз кранлари, ўлчаш асбоблари, радиостанция) (2.5-расм). Мақбул микроиқлимни таъминлаш учун кабиналар калориферлар ва кондиционерлар билан жиҳозланади. Кабинанинг деворлари ва шип қисми товуш ўтказмайдиган материаллар билан пардозланган.

Кузов томи. Кузов томи унинг деворлари каби жиҳозларни ташқи муҳит таъсиридан ҳимоялаш учун мўлжалланган. Кузов томининг бутун узунлиги бўйлаб электровозни қуриш ва таъмирлашда жиҳозлар блокларини ўрнатиш ва ечиб олиш учун туйнуклар кўзда тутилган бўлиб, улар юмшоқ зичлагичларга эга қопқоқлар (люклар) билан беркитилган. Кузовни мустаҳкамликка ҳисоблашда том элементлари мустаҳкамлиги эътиборга олимайди.

• Кузовнинг максимал кўндаланг ўлчамлари габаритлар билан чекланганлиги учун электровозларни лойиҳалаштиришда асосий масала барча керакли жиҳозларни минимал узунликдаги кузовга жойлаштиришдир. Электровознинг узунлиги унинг иқтисодий кўрсаткичларига таъсир этганлиги учун одатда унинг кузови узунлигини камайтиришга ҳаракат қилинади. Электровознинг узунлиги поезднинг фойдали узунлигини (қабул қилиш-жўнатиш йўллари бўйича), депо ва таъмирлаш қурилмаларининг (кўрикдан ўтказиш ариқчалари, қум билан таъминлаш пунктлари, таъмирлаш цехлари) нархини, материаллар сарфини, ишлаб чиқариш майдонлари юзаларини аниқлайди.
• Электровоз (секция) кузовининг минимал узунлиги экипаж қисми билан аниқланади, яъни кузов остида зарб-тиркама қурилмаларини (автотиркагич) ҳисобга олган холда берилган ўқлар (аравачалар) сонини жойлаштириш билан.

•