Toshkent davlat yuridik universiteti

II BOB. TADBIRKORLIK SUBYEKTLARI. 
TADBIRKORLIKNING TASHKILIY-HUQUQIY ASOSLARI 
 
2.1. Tadbirkorlik subyektlari tushunchasi va belgilari 
Halol tadbirkor doimo davlat himoyasida, mening himoyamda.
Shavkat Mirziyoyev
Tadbirkorlik subyektlari tushunchasi va maqomini aniqlash uchun, 
avvalambor, “huquq subyekti” va “fuqarolik huquqi subyekti” 
tushunchalarining mohiyatini chuqur anglab olish lozim bo‘ladi. Huquq 
subyekti keng huquqiy kategoriya hisoblanib, uning tarkibiga amaldagi 
qonun hujjatlariga binoan huquq va majburiyatlarga ega bo‘lgan ijtimoiy 
munosabatlarning barcha ishtirokchilari kiradi. O‘z navbatida, har bir 
huquq tarmog‘ining o‘z subyektlari (davlat huquqida saylovchilar va 
saylanuvchilar, mehnat huquqida ish beruvchi va xodim, moliya huquqida 
soliq to‘lovchi va soliq organi hamda boshqalar) bo‘lganidek, tadbirkorlik 
huquqining ham o‘z subyektlari bor.
Tadbirkorlik huquqining subyektlari
bu tadbirkorlik faoliyatini amalga 
oshirishga vakolatli bo‘lgan shaxslardir.
Jismoniy va yuridik shaxslar fuqarolik-huquqiy munosabatlarda 
tadbirkor sifatida, shuningdek bunday maqomga ega bo‘lmasdan ham 
ishtirok etishlari mumkin. Shuning uchun fuqarolik huquqi subyektlari bir 
vaqtning o‘zida tadbirkorlik huquqi subyektlari hisoblanishi mumkin. 
Tadbirkorlik huquqiy munosabatlarda subyekt har doim tavakkal qilib, o‘z 
javobgarligini zimmasiga olib, foyda olishni maqsad qilgan holda faoliyat 
yuritadi. 
Mamlakatimiz 
mustaqillikka 
erishganidan 
buyon 
davlatimiz 
tomonidan kichik biznes va xususiy tadbirkorlikning yangi ichki mahsulot 
ishlab chiqarishda nafaqat hal qiluvchi mavqe egallashi, balki uning aholi 
farovonligi va daromadlarini orttirishda, ishsizlik muammosini yechishda 
ham muhim omilga aylantirishga erishish yo‘lida ko‘plab ishlar amalga 
oshirilmoqda.