Семинарда муҳокама қилиш учун саволлари:
Маълумки, ИНКОТЕРМС қоидалари асосан товарни сотувчидан сотиб олувчига етказиб беришдаги мажбурият, баҳо ва таваккалчилик шартларини белгилаб беради. Тадбиркорлик фаолиятида ИНКОТЕРМС қоидаларининг қўлланилиши масалаларини шарҳлаб беринг.
Маълумки, импорт контрактлари экспертизадан ўтказилиши лозим. Амалдаги қонунчилик ҳужжатларига асосланиб, экспертизадан ўтказиладиган импорт контрактлари ҳақида маълумот беринг ҳамда бу борадагаи ҳуқуқий асосларни шарҳланг.
МЧЖ “КУК” – Ўзбекистон Республикаси резиденти импорт шартномаси асосида чет эл сотувчи (норезидент) – LLCдан товарлар сотиб олди. Товар етказиб берилди, “эркин муомала учун чиқариш” режимида божхонадан расмийлаштирилган. Шартнома ва тўлов валютаси АҚШ долларида. Тўловни товар етказиб берилган кундан кейин 30 кун ичида МЧЖнинг ўз валюта маблағларидан тўлаб бериш режалаштирилган эди. LLC ўз шартнома мажбуриятларини бажарган, МЧЖ етказиб берилган товарлар учун тўловни амалга ошириши керак. LLC ушбу шартнома асосида талаб қилиш ҳуқуқини Ўзбекистон Республикаси резиденти бўлган МЧЖ “ФУТ”га ўтказган. МЧЖ “КУК” ва LLC импорт шартномасига қўшимча келишув тузишди, унга асосан МЧЖ “КУК” етказиб берилган товарлар учун энди МЧЖ “ФУТ”га етказиб берилган товарларнинг баҳосини сўмда тўлаб бериши керак. Бунга ваколатли банк тузилган қўшимча келишувга эътироз билдириб, тўлов шартномада белгиланган валютада амалга оширилиши кераклиги таъкидлади.
Ушбу ҳолатга ҳуқуқий баҳо беринг, агар бу экспорт операцияси бўлса, унда масала қандай ҳал этилади?
Туман давлат солиқ инспекцияси (ДСИ) МЧЖ “Бинокор”га нисбатан 31257,91 АҚШ доллари (41055389,31 сўм) миқдоридаги валюта тушуми белгиланган муддатда тушмаганлиги учун молиявий жарима қўллаш даъвоси билан хўжалик судига мурожаат қилган. МЧЖ “Бинокор” – ижарага берувчи “INEX” LLC (Буюк Британия) – ижарачи билан 2013 йил 1 сентябрдаги ижара шартномасига асосан умумий майдони 255,78 кв.м. бўлган жойни ижарага берган. Шартноманинг 2.2-бандига асосан ижара ҳақи 1 кв.м. учун 293 АҚШ доллари миқдорида белгиланган. 2014 йилнинг 17 июлида ДСИ томонидан камерал назорат ўтказилган ва унинг натижасида 2014 йил 14 июль ҳолатига 1431257,91 АҚШ доллари миқдорида ижара ҳақи 30 кундан кечиктирилгани аниқланган.
ДСИ Ўзбекистон Республикаси Вазирлар Маҳкамасининг 29.06.2000 й. “Биржадан ташқари валюта бозорини янада ривожлантириш ва мустаҳкамлаш чора-тадбирлари тўғрисида” 245-сонли Қарорнинг талаблари бузилган деб баҳолаб, хўжалик судидан МЧЖ “Бинокор”га нисбатан ушбу Қарорда белгиланган жарима санкциясини қўллашни сўраган.
Ушбу ҳолатга ҳуқуқий баҳо беринг, МЧЖ “Бинокор” ушбу вазиятда ташқи иқтисодий фаолият билан шуғулланганми?
Do'stlaringiz bilan baham: |