Тошкент давлат юридик университети фуқаролик ҳУҚУҚИ дарслик II қисм

Назорат учун саволлар:
1. Ижара шартномалари турларидан бири бўлган уй-жой ижараси шартномаси бошқа ижара шартнома турларидан кўра нисбатан кўп қўлланиладиган шартнома ва маълум ҳолларда тарафлар ўртасида низоли ҳолатлар бўлиши мумкин. Ушбу ҳолатни қандай изоҳлайсиз? Уй-жой ижараси шартномасининг муҳим шартини изоҳланг.
2. Уй-жой ижараси шартномасининг шакли ва расмийлаштириш тартибини ёритинг?
3. Олимов ўзига тегишли квартирани Рафиқовга ижарага берди. Тарафлар бу хусусда ёзма шартнома тузишди. Лекин шартноманинг муддатини белгилашмади. Уч йилдан сўнг Олимов уй-жой ўзига ке­раклигини айтиб, Рафиқовдан уй-жойни бўшатиб қўйишни талаб қил­ди. Бунга жавобан Рафиқов уй-жойни бўшатишнинг иложи йўқлиги­ни, қонун бўйича уй-жой ижараси шартномасида муддат кўрсатил­маган бўлса у 5 йил муддатга тузилган деб ҳисобланишини ва уйни фаҳатгина 2 йилдан сўнг бўшатиб беришни айтди. Олимов Рафиқов­нинг жавоби тўғри ёки нотўғрилигини билиш мақсадида юридик маслаҳатхонага мурожаат қилди.
Олимовга юридик маслаҳат беринг.
4. “Компрессор” заводи ўз ходимларини вақтинчалик уй-жой билан таъминлаш мақсадида Ўзбекистон Миллий Университети (ЎзМУ) маъмурияти билан ЎзМУга тегишли талабалар шаҳарчасида жойлашган беш қаватли 25-ётоқхонани ижарага олиш тўғрисида 5 йил муддатга шартнома тузди. Орадан 2 йил ўтгач , заводнинг ўзи ётоқхона қургач, 25-ётоқхонадаги ишчиларни янги ётоқхонага кўчирди. Ва 25-ётоқхонани завод ходимларини малакасини ошириш ўқув марказига ўқув машғулотлари учун берди.
Бундан хабар топган ЎзМУ маъмурияти заводдан 25-ётоқхонани қайтариб беришни, завод уй-жойдан белгиланган мақсадда фойдалан­маётганлиги учун шартномани бекор қилишини ва заводнинг айби билан шартнома бекор бўлганлиги учун қолган муддатга ҳам ижара ҳақи тўлашни талаб қилди.
“Компрессор” заводи ЎзМУ маъмуриятининг барча талабларини рад қилиб, 25-ётоқхонанинг ички ва ташқи кўринишини ўзгартирма­ганини, ижара ҳақини ўз вақтида тўлаётганлигини, шартномани бекор бўлиш масаласида айб Университет маъмурияти зиммасидалигини, шунинг учун ҳам ётоқхона ижара шартномаси тугамагунча қайтариб берилмаслигини билдирди.
Университет маъмурияти юқоридаги талаблар билан судга мурожаат қилди. Суд қандай қарор чиқариши лозим?