Тошкент давлат юридик университети фуқаролик ҳУҚУҚИ дарслик II қисм

Назорат учун саволлар

1. Контрактация шартномасининг бошқа олди-сотди шартномаларидан фарқли, ўзига хос хусусиятларини изоҳланг.

2. Контрактация шартномаларининг бажарилиши юзасидан мониторинг олиб бориш тартибини тушунтиринг.
3. Фермер хўжалиги билан “Пахта тозалаш заводи” акциядорлик жамияти ўртасида контрактация шартномаси тузилган. Шартномага асосан фермер хўжалиги пахта хом-ашёсини “Пахта тозалаш заводи” акциядорлик жамиятига етказиб бериш, жамият эса маҳсулотни қабул қилиш ҳамда унинг ҳақини тўлаш мажбуриятини олган.
Фермер хўжалиги томонидан шартномада белгиланган миқдордаги ҳамда навдаги пахта хом-ашёси етказиб берилмаган. Шу сабабли “Пахта тозалаш заводи” акциядорлик жамияти судга мурожаат қилиб, фермер хўжалигидан жарима ва зарар ундиришни сўраган.
Ишни кўришда фермер хўжалиги жамият билан контрактация шартномаси тузилган бўлсада, ушбу шартнома туман қишлоқ ва сув хўжалиги бўлимида рўйхатдан ўтказилмаганлигини, рўйхатдан ўтказилмаган шартнома эса Фуқаролик кодексига мувофиқ ҳақиқий эмас деб ҳисобланишини билдириб, ундирилиши сўралган жарима ҳамда зарарни қаноатлантириш рад этилиши лозимлигини билдирган.
Ушбу ҳолатга ҳуқуқий баҳо беринг?
4. Фермер хўжалиги билан “Пахта тозалаш заводи” акциядорлик жамияти ўртасида контрактация шартномаси тузилган.
Контрактация шартномаси туман қишлоқ ва сув хўжалиги бўлимида тегишли тартибда рўйхатдан ўтказилган.
Фермер хўжалиги томонидан шартномада белгиланган миқдордаги пахта хом-ашёси етказиб берилмаган. Шу сабабли жамият судга мурожаат қилиб, фермер хўжалигидан жарима ундиришни сўраган.
Биринчи инстанция суди ишни кўриш жараёнида фермер хўжалиги жамият билан тузилган контрактация шартномасини бажариш мақсадида пахта экини экилганлигини, экинни парваришлаш ишлари тўлиқ амалга оширилганлигини, бироқ об-ҳаво яхши бўлмаганлиги сабабли яхши ҳосил олинмаганлигини, об-ҳавонинг ноқулай келиши форс-мажор ҳисобланишини, ушбу ҳолатни енгиб бўлмайдиган куч ҳолатлари(форс-мажор)ни тасдиқлаш бўйича комиссия вакиллари келиб кўрганлигини, шу сабабли ундирилиши сўралган жаримани қаноатлантириш рад этилиши лозимлигини билдирган.
Ушбу ҳолатга ҳуқуқий баҳо беринг?