Тошкент давлат юридик институти

Объектив томондан товламачилик айбдорнинг мулкдордан била туриб, ғайриқонуний равишда ўзига ёки у кўрсатган шахсларга муайян мулкни, мулкка бўлган ҳуқуқни топширишни, мулкий манфаатлар беришни ёхуд улар фойдасига муайян мулкий йўсиндаги ҳаракатлар қилишни қўрқитиш йўли билан талаб этишда шунингдек, жабрланувчини ўз мулки ёки мулкка бўлган ҳуқуқини беришга мажбур қиладиган шароитга солиб қўйишда ифодаланади.
Товламачилик учун жиноий жавобгарликка тортишга, айбдорнинг зўрлик ишлатиш тўғрисидаги таҳдидини амалга оширган бўлиши шарт бўлмай, бундай талаб қўйилишининг ўзи етарлидир³³.
Демак, объектив томондан товламачилик иккита асосий элементдан иборат:

1. 
   товламачилик йўл билан қўрқитиш;
   
2. 
   товламачилик йўли билан талаб қилиш.
   

Мана шу 2 та элементнинг мавжудлиги жиноятни тамом бўлган, деб ҳисоблаш учун асос бўлади.
Қўрқитиш ва талаб қилиш бошқа талон-торож қилиш жиноятлари, жумладан талончилик, босқинчиликда ҳам бўлиб, у қилмишларда мулк қўрқитиш ёки талаб қилиш вақтидаёқ олинади, лекин товламачиликдаги қўрқитиш ёки талаб қилишда мулкни олиш келгусига қолдирилади ва мулк кейинчалик олинади.
Қилмишни товламачилик деб топиш учун қуйидаги белгилардан бири бўлиши лозим:
1) жабрланувчи ёки унинг яқин кишиларига зўрлик ишлатиш билан қўрқитиб ўзгадан мулкни ёки мулкий ҳуқуқни топширишни, мулкий манфаатлар беришни ёхуд мулкий йўсиндаги ҳаракатлар содир этишни талаб қилиш ёхуд жабрланувчини ўз мулки ёки мулкка бўлган ҳуқуқини беришга мажбур қиладиган шароитга солиб қўйиш.
Зўрлик ишлатиш билан қўрқитиш деганда айбдор томонидан жабрланувчи ёки унинг яқин кишилари соғлигига ҳар қандай шикаст (енгил, ўртача, оғир шикаст) етказиш, уриш, дўппослаш, номусга тегиш ёки ўлдириш кабилар билан қўрқитиб мулкий манфаат талаб этилиши тушунилади. Бунда товламачилик бошқа жиноятлар (масалан, ЖК 112-моддаси (ўлдириш ёки зўрлик билан қўрқитиш)) белгиларини ўз ичига қамраб олиб, қилмиш жиноятлар жами тариқасида квалификация қилинмайди;