Toshkent davlat agrar universiteti n. Ashurmetova, D. Saidova, R. Kamalova iqtisodiyot nazariyasi

SO’Z BOSHI
Hozirgi vaqtda jahon mamlakatlarining iqtisodiyotini to’la qamrab olayotgan jahon moliyaviy-iqtisodiy inqirozi iqtisodiy faoliyat bilan shuq’ullanayotgan kadrlarning bilim darajasini yanada yuqoriroq bo’lishini, o’zgarib turgan muhit sharoitiga mos qarorlar qabul qilishlarini talab qilmoqda.
Iqtisodiy munosabatlarning mazmun-mohiyati, ularning amal qilish qonun va qonuniyatlarini chuqur va har tomonlama o’rganishda eng avvalo "Iqtisodiyot nazariyasi" fanining roli beqiyosdir.
Amaliyotda insonlarning iqtisodiy jarayonlar va hodisalarni to’g’ri baholay olishi, ularning iqtisodiy bilimi va qobiliyatiga bog’liq, shuning uchun hayotda iqtisodiyotdagi nazariyalarni, qoidalarni, ilmiy tushunchalarni o’rganish katta ahamiyatga ega. Oliy o’quv yurtlarining talabalari iqtisodiy muammolarning sabablarini aniqlash, tahlil qilish, iqtisodiy taraqqiyotga baho berish, iqtisodiyotdagi o’zgarishlar kelajakda qanday samara berishi kabi masalalarni hal etishlari uchun iqtisodiyot nazariyasi fanini chuqur o’rganishlari zarur.
Kadrlar tayyorlash milliy dasturida chuqur nazariy va amaliy bilimlar bilan bir qatorda tanlagan sohasi bo’yicha mustaqil faoliyat ko’rsata oladigan, o’z bilimi va malakasini mustaqil ravishda oshirib boradigan, masalaga ijodiy yondoshgan holda muammoli vaziyatlarni to’g’ri aniqlab, tahlil qilib, sharoitga tez moslasha oladigan mutaxassisllarni tayyorlash asosiy vazifalardan biri sifatida belgilangan.
Tajribalar shuni ko’rsatadiki, talaba mustaqil ravishda shug’ullansa va o’z ustida tinimsiz ishlasagina bilimlarni chuqur o’zlashtirishi mumkin. Talabalarning asosiy bilim, ko’nikma va malakalari mustaqil ta’lim jarayonidagina shakllanadi, mustaqil faoliyat ko’rsatish qobiliyati rivojlanadi va ularda ijodiy ishlashga qiziqish paydo bo’ladi.
Shuning uchun talabalarning mustaqil ta’lim olishlarini rejalashtirish, tashkil qilish va buning uchun barcha zaruriy shart-sharoitlarni yaratish, dars mashg’ulotlarida talabalarni o’qitish bilan bir qatorda ularni ko’proq o’qishga o’rgatish, bilim olish yo’llarini ko’rsatish, mustaqil ta’lim olish uchun yo’llanma berish oliy ta’lim muassasasining asosiy vazifalaridan biri hisoblanadi.