Тошкент ахборот технологиялари университети оптик алоқа тизимлари

ПРИнинг иккинчи стандарти 1 544 кбит/с тезликка эга бўлиб, у 1 544 (ёки DS1)-6 312 (ёкиDS2)-32 064 (ёки DSJ3)-97 728 (ёки DSJ4) кбит/с кетма-кетлигини (1,5-6-32-98 Мбит/с тақрибий катталиклар қаторини) ташкил қилади. Ушбу стандарт учун мультиплексирлаш коэффициентлари тегишли равишда n=24, m=4, I=5, k=3га тенг. Бу иерархия DSO(ёки АРК)нинг 24, 96, 480 ва 1440 каналларини ташкил қилишга имкон беради. Бу ерда DSJ3 ва DSJ4 сигналларини 3 ва 4 сатхли япон ПРИнинг рақамли каналлари (ёки оқимлари) дейилади.
ПРИнинг учинчи стандарти 2 048кбит/с тезликка эга бўлиб, у 2 048 (ёки Е1: бирламчи рақамли канал-оқим)-8448 (ёки Е2: иккиламчи рақамли канал-оқим)-34368 (ёки Е3: учламчи рақамли канал-оқим)-139264 (ёки Е4: тўртламчи рақамли канал-оқим)-564992 (ёки Е5: бешламчи рақамли канал-оқим) кбит/с кетма-кетлигини ёки 2-8-34-140-565 Мбит/с тақрибий кетма-кетлигини ҳосил қилади, бу n=30, m=I=k=4га тенг мультиплексирлаш коэффициентларига тўғри келади. Ушбу стандарт тегишли равишда 30, 120, 480, 1920 ва 7680 АРКни узатишга имкон беради, улар одатда ИКМ-30, ИКМ-120, ИКМ-480ва ИКМ-1920рақамли узатиш тизимлари номи билан аталадилар. Турли стандартдаги ПРИ рақамли оқимларни мультиплексирлаш схемаси 12.2-расмда ифодаланган.


12.2-расм. ПРИнинг Шимолий Америка (ШAC), Япония (ЯС) ва Европа (ЕС) стандартларидаги мультиплексирлаш (-) ва кросс-мультиплексирлаш (---) схемаси

ПРИ нинг учта турли стандартларининг параллел равишда ривожланиши жаҳон бўйлаб улкан телекоммуникация тармоқларининг ривожланишини тўхтатиб турганлиги учун, телекоммуникациялар бўйича Халқаро электр алоқа иттифоқи ХТИ томонидан уларни бир хиллаштиришга ва имкон қадар бирлаштиришга оид қадамлар қўйилди. Натижада шундай стандарт ишлаб чиқилдики, унга кўра:

биринчидан, ИКМ ва каналларни вақт бўйича ажратиш асосида рақамли узатиш тизимларини ташкил қилишда асосий стандарт сифатида ПРИ биринчи стандарти (DS1-DS2-DS3) нинг учта биринчи сатхлари, иккинчи стандарти (DS1-DS2-DSJ3-DSJ4) нинг тўртта сатхлари ва учинчи стандарти (Е1-Е2-Е3-Е4) нинг тўртта сатхлари стандартланган ва стандартларнинг кросс-мультиплексирлаш, масалан, учинчи стандартдан биринчи стандартга (биринчидан иккинчи сатхга) ва аксинча (учинчидан тўртинчи сатхга) кросс-мультиплексирлаш схемаси 12.1-расмда кўрсатилган (мультиплексорлаш коэффициентлари узатиш тезликларини тақдим этувчи блокларнинг алоқа линияларида кўрсатилган);
иккинчидан, иккинчи стандартда 32 064...97 728 кбит/с (яхлитланган ҳолда 32...98 Мбит/с) тармоғи, яъни биринчи стандартдаги DS3 ва учинчи стандартдаги Е4 сатхларига параллел бўлган DSJ3 ва DSJ4 сатхлари сақланган бўлади. DSJ3 сатх Е3 сатхга мос бўлади, бу эса иккинчи сатхдан учинчи сатхга кросс-мультиплексирлашни осонлаштиради.