Ótmishke ókinish…

Ótmishke ókinish…
Bul dunyada óziń islegen iygilikli islerdi yadqa alǵannan kóre ózgeler tárepinen saǵan islengen, bir ómir yadińda qalatuǵin umitilmas máwritlerdi hámiyshe eslep, ózimiz de ózgelerge qolimizdan kelgenshe jaqsi ámellerdi qiliwimiz kerek. Biz ushin ápiwayi kómek bolip túyilgen nárse járdemge mútáj insan ushin ómiriniń aqirina shekem umitilmaytuǵin waqiya boliwi múmkin.
Meniń ómirimde de balaliqtaǵi is-háreketlerim arqali ómirlikke uyalip júretuǵin waqiyalar bolǵan. Bul meniń ómirlikke qarizdar bolǵan insanlarim haqqinda bolip buni aq qaǵazǵa túsirmektemen.
Biz musilman xaliq bolǵanliqtan atam hár jili oraza ayinda oraza tutatuǵin edi. Men sol waqitta bala edim, oraza ayinda atamniń qasinda uyiqlaytuǵin edim. Sebebi tańda erte kún shiqpastan atam menen turip atam awiz ashqan waqitta birge awqatlaniw ushin. Anam hár kúni tańda dasturxanǵa iyjan, taqan, sók, xurma, qara nan, qaymaq siyaqli taǵamlardi qoyatuǵin edi. Atam kún shiqpay turip tańda awqatlanǵannan, keshke kún batqanǵa shekem hesh nárse jemeytuǵin edi.
Sol kúnlerdi eslesem, atam ushin arnalǵan dasturxan taǵamlarin jegen kúnlerimdi eslesem, kórgensizlik qilǵanimdi, tek ǵana tatli taǵamlardi jew ushin erte oyanǵanima pushaymanlar jeymen.
Jáne de bir kúni minaday waqiya bolǵan edi;
Bizler úyde tawiq baǵatuǵin edik. Bir kúni atam:
—Tawiq ketekte neshe mayek bar kór dedi.
Men ketekti kórip:
—Birew dedim. Atam bolsa,
—Qoyaǵoy onda dedi.
Biraq ketekte eki mayek bar edi. Bizlerdi kishkeneligimizde tawiq ketektiń ishine neshe mayek tuwsada bir mayek orninda «maya»ǵa qaliwi kerek dep úyretken edi. Atamniń ketekte neshe mayek bar kór degeninde atamniń mayek quwirip jegisi kelgenligin sezemen. Sebebi bir mayekke atam hám men toymaytuǵin edik. Soniń ushin da atam qoyaǵoy onda degen eken.
Sol kúnlerdi eslesem ótmishime sonshelli ókinip ketemen. Aradan sonsha jillar ótip eseydim.. Joqari maǵliwmatli, óz jumisima iye boldim. Shańaraqli, eki perzentli boldim. Men de perzentlerim awqatlanǵanina quwanip geyde olar aldina isirip qoyaman. Házir atam janimizda bolǵaninda tatli taǵamlardi berip meni álpeshlegenindey etip qarar edim… Átteń, atam qasimizda emes…
Degen menen men atamday oulli insanniń aqliǵi emespenbe? Atamniń qani meniń tamirimda aǵip turǵan joqpa?
—Awa
Demek, men de ómirim dawaminda qolimnan kelgenshe óz perzentlerim, dógeregimdegi insanlarǵa, tanis-biytanis insanlarǵa járdem beriwim kerek. Ómirdiń nizamliqlari sonnan ibarattay…


Kegeyli rayoni 23-sanli mekteptiń Dóretiwshi-mádeniy mқseleler boyinsha úgit násiyatshisi Nurjanova Jadira Erǵaliyevna