Тиббий биология ва генетика Тиббиёт олийгохи талабалари учун дарслик

II. боб. Ҳужайра биологияси
2.1. Тирикликнинг молекуляр ва ҳужайрасиз асослари
Нуклеин кислоталарнинг тузилиши ва функцияси
Ҳужайрада ёки организмда алоҳида белгининг ривожланиши ирсиятнинг элементар функционал бирлиги бўлган ген орқали белгиланади. Генларнинг ҳужайра ва организмларнинг бир неча авлодларига узатилиши хисобига авлодларда ота – она белгиларини қабул қилишга моддий асос яратилади. Ирсий материал ва ўзгарувчанликнинг функционал бирлиги бўлган геннинг асосий хоссалари унинг кимёвий тузилиши билан белгиланади.
Ирсий материалнинг кимёвий табиатини аниқлашга қаратилган изланишлар ирсият ва ўзгарувчанликнинг моддий асоси Ф.Мишер томонидан 1869 йилда ҳужайра ядроси топилган нуклеин кислоталар эканлигини тасдиқлади. Нуклеин кислоталар тирик организмларда ҳосил бўладиган молекулаларнинг энг йириги бўлиб, уларнинг молекуляр массаси 10000 дан бир неча миллион углерод бирлигига тенг шунинг учун уларни макромолекулалар дейилади.
Нуклеин кислоталар энг кўп ҳужайра ядросида бўлади, шу билан бирга уларнинг цитоплазмада ва органоидларда(митохондрий, пластидалар) учрайди. Нуклеин кислоталар биополимерлар бўлиб, мономерлар – нуклеотидлардан иборат (1-расм), ҳар бир нуклеотид фосфат гуруҳи, беш углеродли ғқанддан(пентоза) ва азотли асосдан(пурин, пиримидин) ташкил топган.

1-расм.
Пентоза молекуласидаги биринчи углерод атомига(С – 1¹) азотли асос(аденин, гуанин, цитозин, тимин ёки урацил) бирикади, углероднинг бешинчи атомига эса(С – 5¹) эфир боғлари ёрдамида фосфат бирикади; углероднинг учинчи атомида(С – 3¹) доимо гидроксил гуруҳи - ОН бўлади.
Нуклеин кислоталрнинг макромолекуласига нуклеотидларнинг бирикиши битта нуклеотид фосфатининг иккинчи нуклеотид гидрооксили билан ўзаро таъсири яъни фосфоэфир боғини ҳосил қилиш йўли билан амалга ошади, натижада полинуклеотид занжир ҳосил бўлади. Полинуклеотид занжирнинг ҳосил бўлиши полимераза ферменти иштирокида амалга ошади, бу фермент олдинги нуклеотиднинг 3¹ холатида турган гидроксил гурухига кейинги нуклеотиднинг фосфат гуруҳи бирикишини таъминлайди. Полимераза ферментининг юқорида таъкидланган таъсири ҳисобига полинуклеотидзанжирнинг узайиши фақат битта томонда: яъни 3¹ ҳолатидаги эркин гидроксил бор жойда амалга ошади. Занжир бошланиши доимо 5¹ ҳолатидаги фосфат гуруҳини ташийди, бу эса унда 5¹ ва 3¹ томонларни ажратишга имкон беради. Пентоза турига қараб нуклеин кислоталарнинг иккита тури фарқланади ДНК – дезоксирибонуклеин кислота ва РНК – рибонуклеин кислота.