Termiz davlat universiteti tabiiy fanlar fakulteti geografiya kafedrasi

Саноати. Исроил иқтисодиётида ҳарбий саноат асосий ўринни эгаллайди. Исроил саноати илм фан ютуқларига асосланган тармоқлар — тиббий электроника, алоқа воситалари, компьютерлар ишлаб чиқаришга ихтисослашган. Металл ишлаш, машинасозлик (жумладан, самолётсозлик, кемасозлик, айниқса уларнинг ҳарбий турлари), электротехника, электроника, кимё саноати, олмосни қайта ишлаш ҳам ривожланган. Енгил саноатнинг тўқимачилик, тикувчилик, кўнчилик каби тармоклари мавжуд. Озиқ-овқат, ёғочсозлик, нефтни қайта ишлаш, бинокорлик материаллари саноати ривож топган. Бир оз миқдорда калий ва тоштуз, мис ва темир рудалар, нефть қазиб олинади. Энергетика, асосан, четдан келтирилган хом ашё негизига қурилган. Асосий саноат марказлари — Тель-Авив, Хайфо шаҳарлари ҳисобланади.
Қишлоқ хўжалиги. Экинзорларнинг аксар қисми давлатга ва Яҳудий миллий жамғармасига қарашли бўлиб, бу ерлар кибуца, мошава деб аталган қишлоқ хўжалиги ширкатларига ижарага берилади. Ер майдонларининг 20% дан кўпроғи ишланади, унинг 40% дан ортиғи суғорилади. Қишлоқ хўжалигининг асосий тармоғи — деҳқончилик. Экспорт учун, асосан, цитрус мевалар етиштирилади (йилига 1,5 млн. тонна), булар бошқа мевалар билан бирга қишлоқ хўжалиги маҳсулоти асосий қийматининг 30% ни ташкил этади. Ички эҳтиёж учун буғдой, картошка, сабзавот, техника экинларидан пахта, қанд лавлаги, зайтун ва бошқа экинлар экилади. Боғдорчилик, токчилик, гулчилик билан н ҳам шуғулланилади. Чорвачилигида қорамол, қўй ва эчки, шунингдек, парранда боқилади. Балиқчилик қам ривожланган.
Транспорти. Асосан, автомобиль транспорти ривожланган, автомобиль йўлларининг узунлиги — 13 минг км. Темир . йўл узунлиги — 890 км. Денгиз савдо флоти муҳим ўрин тутади. Денгиз портлари: Хайфо, Ашдод, Эйлат. Тель-Авив яқинида халқаро аэропорт бор. Бир неча нефть қувурлари бўлиб, улар орқали Қизил денгиз соҳилидан Ўрта денгиз портларига нефть оқизилади. Исроил четга қишлоқ хўжалиги ва машинасозлик маҳсулотлари, тарашланган олмос, маъданли ўғит, кимёвий моддалар, қурол-яроғ чиқаради. Четдан машина ва асбоб ускуна, тарашланмаган олмос, нефть, кимёвий маҳсулотлар, транспорт воситалари олади. Савдо-сотиқдаги асосий мижозлари: АҚШ, Буюк Британия, Германия. Пул бирлиги — шекель.