Tema: Balalar so’ylewinde ushrasatugin morfologiyaliq ha’m sintaksislik qa`teler. Reje

Oyın atı: «Su`wret boyınsha ga`p du`z».
Oyınnın` maqseti. Balalarda so`ylewdin` grammatikalıq qurılısları, oy-o`risin rawajlandırıw. Predmetler, na`rse-buyımlar ha`m ha`diyseler arasındag`ı baylanıslardı anıqlawg`a, olardı o`z so`ylew tilin grammatikalıq formalar ja`rdeminde bayanlawg`a u`yretiw.
Oyınnın` materialı. Adamlar, haywanlar, ta`biyat ha`diyseleri ha`m basqalardı sa`wlelendiriwshi predmetli su`wretler.
Oyınnın` barısı. Ta`rbiyashı balalarg`a bir qansha su`wretlerdi ko`rsetedi. Balalar 10 g`a jaqın ko`rsetilgen su`wretlerden keminde eki-u`shewin paydalanıp, a`piwayı ha`m quramalı ga`pler du`ziwi lazım. Ma`selen, ta`rbiyashı giya, bo`rtik shıg`arıp baslag`an terek, bag`, japıraq, quslar ini, balalar, qarlıg`ash, puta, quyash ha`m t.b. ko`rinisindegi su`wretlerdi tanlaydı. Balalar usı su`wretler tiykarında ga`p du`ze baslaydı: «Terek bo`rtiklerinen jas japıraqlar shıg`a basladı, sebebi olardı quyash ısıttı»; «Quyash nurlarınan maysalar u`sti jaltıraydı»; «Ba`ha`rde qarlıg`ash uya saldı», «Ba`ha`r keldi, terekler bo`rtik jarıp, japıraqlar shıg`ara basladı», «Ba`ha`r keldi, ku`nler ısıdı, terekler gu`lledi». Son`ınan ta`rbiyashı belsendi qatnasqan balalardı xoshametleydi.
Oyınnın` atı: «Kim bilse, dawamın aytsın».
Oyınnın` maqseti. Balalardı a`piwayı jay ga`pler du`ziwge u`yretiw, durıs so`z tan`law u`stinde shınıg`ıwlar islew.
Oyınnın barısı. Ta`rbiyashı balalardın` birewine qa`legen bir so`zin aytıwın usınadı. Onın` qasında otırg`an bala joldası aytqan so`z ma`nisine sa`ykes keletug`ın sonday so`z tan`lanıwı kerek, onnan ga`p payda bolıp, usı ta`rtipte u`shinshi, to`rtinshi, besinshi bala usı ga`pti ken`eyttiriwshi so`zlerdi aytadı. Usılayınsha bir-birine baylanısqan, beluili bir ma`niske iye bolg`an ga`p du`ziledi. Ma`selen: birinshi bala «tan`» so`zin aytadı, ekinshisi «attı» so`zin aytıp, ga`p payda etedi – «Tan` attı»; u`shinshisi «Tan` attı, quyash shıqtı», to`rtinshisi «Tan` attı, quyash shıqtı ha`m nur shashtı», besinshisi «Tan` attı, quyash nurın shashtı, ha`mme oyandı». Son`ınan balalar ta`repinen aytılg`an basqa so`zler ja`rdeminde ga`pler du`ziledi. Oyında aktiv qatnasqan balalar ta`rbiyashı ta`repinen xoshametlenedi.