Tavakkalchilikni pasaytirish yo`llari

Tavakkalchilikni taqsimlash, odatda, korxonaning aktivlarini taqsimlash yo`li bilan amalga oshiriladi.

Mulk tadbirkor oilasining turli a’zolari nomiga o`tkaziladi yoki shu maqsad uchun yaratilgan korporatsiya va trast firmalari nomiga o`tkaziladi. Bunda bir maqsad atrofida birlashgan tadbirkor oilasi a’zolari yoki yaqin aloqada bo`lgan tadbirkorlar guruhi (shirkat, korporatsiya, kontsern va boshqa) tavakkalchilik qilish oqibatida ko`rilishi mumkin bo`lgan foyda va zararlarni o`zaro taqsimlaydilar.

Tavakkalchilikni taqsimlash orqali kamaytirish usullaridan biri diversifikatsiyalashdir. Uning mohiyati bir-biri bilan bog`liq turli faoliyat ko`rinishlari o`rtasida kapital qo`yilmalarni va tovar-moddiy resurslarni taqsimlashdan iborat. Agar tavakkalchilik oqibatida bir faoliyat turidan zarar ko`rilsa, boshqasidan ko`rilgan foyda hisobidan uni qoplash mumkin.

Diversifikatsiyalash ishlab chiqarish, tijorat va investitsion faoliyat sohalarida tavakkalchilikni kamaytirish imkonini yaratadi. Tavakkalchilikni diversifikatsiyalash quyidagi yo`llar bilan amalga oshirilishi mumkin:

- kapital sarflarni bir nechta faoliyat turlariga bo`lib sarflash;

- har xil turdagi yuqori daromad keltiradigan qimmatli qog`ozlarga investitsiya qilish;

- moddiy-texnik ta’minoti bo`yicha tashqi sheriklar sonini ko`paytirish;

- turli sigmentlarni qamrab olgan bozor va iste’molchilar talabiga mos tovarlar ishlab chiqarish;

- bozor konyunkturasi va iste’molchilar sigmentiga mos keluvchi turli baho siyosatini yuritish;

- yuk tashuvchi turli transport korxonalari xizmatidan foydalanish;

- tovar-moddiy zaxiralarni bir nechta joyda bo`lib saqlash va hokazo.