Ташкентский государственный

1. Умумий қоидалар


1.1. Ушбу «Умумтаълим мактабларининг одоб-ахлоқ қоидалари» (бундан буён матнда «Қоидалар» деб юритилади) Ўзбекистон Республикасининг Конституцияси, «Таълим тўғрисида»ги, «Кадрлар тайёрлаш миллий дастури тўғрисида»ги, «Ёшларга оид давлат сиёсатининг асослари тўғрисида»ги, «Бола ҳуқуқлари кафолатлари тўғрисида»ги, «Вояга етмаганлар ўртасида назоратсизлик ва ҳуқуқбузарликларнинг профилактикаси тўғрисида»ги, «Ахборот эркинлиги принциплари ва кафолатлари тўғрисида»ги Қонунлар, «Ёшлар йили», «Баркамол авлод йили» Давлат дастурлари, Халқ таълими вазирлигининг тегишли буйруқлари, умумтаълим мактабларининг ички тартиб- қоидалари ҳамда умумэътироф этилган маънавий-ахлоқий тамойиллар асосида ишлаб чиқилган.
1.2. «Қоидалар» Республика таълим маркази ҳузуридаги Маънавий маърифий ишлар йўналишдаги Илмий-методик кенгаш томонидан тасдиқланганидан cўнг кучга киради ва унга ўзгартириш ҳамда қўшимчалар киритиш Илмий-методик кенгаш қарорига биноан амалга оширилади.
1.3. «Қоидалар» таълим муассасаларининг маъмурияти, педагог-тарбиячилари, техник ходимлари ва ўқувчилари (жамоа аъзолари)нинг таълим муассасасига оид ўзаро муносабатларидаги одоб-ахлоқ тамойиллари, риоя этишлари шарт бўлган хулқ-атвор меъёрлари ва мажбуриятларини белгилаб беради.
1.4 «Қоидалар»га риоя қилиш таълим муассасаси жамоа аъзоларининг барчаси учун мажбурий хисобланади.
1.5. Ўқувчиликка ва ишга қабул қилинаётган ҳар бир шахс «Қоидалар» билан танишиб чиқиши ҳамда унга риоя қилишини ўз зиммасига олиши шарт.
1.6. Умумтаълим мактаблари жамоат, давлат ва нодавлат ташкилотлари, таълим ва илмий муассасалар, тадбиркорлик субъектлари, оммавий ахборот воситалари ҳамда ўқувчиларнинг ота-оналари билан ўзаро муносабатларда «Қоидалар»даги кўрсатмаларга риоя этилишини тақозо этади.

2. Мақсад ва вазифалар

2.1. «Қоидалар»нинг мақсади умумтаълим мактабларида соғлом маънавий ва ижтимоий-психологик муҳитни шакллантириш, ёш авлодга замон талаблари асосида билим, миллий ғоя ва қадриятлар ҳамда умуминсоний фазилатларга мос тарбия бериш, таълим муассасаларида ўқув-тарбия жараёнининг сифати ва маънавий-маърифий ишлар самарадорлигини оширишга шароит яратишдир.
2.2. «Қоидалар»нинг асосий вазифалари:

• 
  умумтаълим мактаблари жамоа аъзоларининг маънавий иммунитетини шакллантириш, сақлаш ва ҳимоя қилиш;
  
• 
  ўқувчилар орасида одоб-ахлоқни бузишга, шу жумладан зўравонлик, ҳаёсизлик ва шафқатсизликни ташвиқот қилишга қаратилган ҳар қандай хатти-ҳаракатларнинг олдини олиш, жумладан, ёшларни ичкиликбозлик ва гиёҳвандлик иллатларидан, бошқа турли ҳалокатли таҳдидлар ҳамда биз учун ёт бўлган диний ва экстремистик таъсирлардан, паст савияли «Оммавий маданият» хуружларидан ҳимоя қилишга кўмаклашишдан иборат.