Taqqoslash jadval

“Oʻzbekiston Respublikasining Oila kodeksiga qoʻshimcha kiritish haqida”gi
Oʻzbekiston Respublikasining qonuni loyihasi boʻyicha
TAQQOSLASH JADVAL

Amaldagi tahrir	Taklif etilayotgan tahrir	Asoslantirish
Toʻldirilmoqda.	4^1-modda. Oilaviy sir Oilaviy sirni tashkil etadigan maʼlumotlar (oila aʼzolari oʻrtasidagi munosabatlar, ularning tarjimayi holi, er-xotinning shaxsiy hayoti, mulkiy munosabatlari, farzandlikka olish va oila aʼzolari sir saqlashni istagan boshqa maʼlumotlar) qonun bilan muhofaza qilinadi. Oilaviy sirni tashkil etuvchi maʼlumotlarni yigʻish va tarqatish qonunchilik hujjatlarida belgilangan javobgarlikka sabab boʻladi.	Oilaviy sirga tegishli maʼlumotlar himoya qilinishini taʼminlash maqsadida oilaviy sir va uni tashkil etuvchi maʼlumotlarni amaldagi qonunchilik hujjatlariga kiritish taklif etilmoqda. Amaldagi qonunchilik hujjatlarida shaxsning shaxsiy yoki oilaviy sirini tashkil etuvchi shaxsiy hayoti toʻgʻrisidagi maʼlumotlarni uning roziligisiz oshkor qilganlik uchun javobgarlik belgilangan. Maʼlumot uchun: Maʼmuriy javobgarlik toʻgʻrisidagi kodeksning 46^1-moddasi hamda Jinoyat kodeksining 141^1-moddasida shaxsning shaxsiy yoki oilaviy sirini tashkil etuvchi shaxsiy hayoti toʻgʻrisidagi maʼlumotlarni uning roziligisiz qonunga xilof ravishda yigʻish yoki tarqatish uchun javobgarlik belgilangan. Biroq, amaldagi qonunchilik hujjatlarida oilaviy sir tushunchasi va uni tashkil etuvchi maʼlumotlar qanday turdagi maʼlumotlarni oʻz ichiga olishi nazarda tutilmagan. Bu esa, huquqni qoʻllash amaliyotida oilaviy sirni oshkor qilgan shaxslarni javobgarlikka tortishda tushunmovchiliklarga sabab boʻlmoqda. Rossiya Federatsiyasi va Qozogʻiston Respublikasida oilaviy sir va uni muhofaza qilish masalasi konstitutsiyaviy darajada belgilangan. Rossiya Federatsiyasi Konstitutsiyasining 23-moddasida har bir insonning shaxsiy hayot daxlsizligini, shaxsiy va oilaviy sirlarini, oʻz shaʼni hamda nomini himoya qilish huquqiga ega ekanligi belgilangan. Qozogʻiston Respublikasi Konstitutsiyasining 18-moddasi va Oila kodeksining 53-moddasida shaxsiy hayot daxlsizligi, shaxsiy va oilaviy sirlarni muhofaza qilish tartibi belgilangan.