Тактиканинг фан сифатида вазифалари

Maxsus geografik kartalar deb, asosida umumgeografik karta yotishiga qaramasdan, biror-bir muhim axborot turi ajratib yoki bo‘rttirib ko‘rsatilgan kartalarga aytiladi. Ularga aeronavigatsion (unda navigatsiya ma’lumotlari tushirilgan bo‘ladi), yo‘l kartalari (ularda yo‘llar odatdagidan qalinroq tasvirlangan va batafsil ta’riflangan bo‘ladi), relef kartalari (unda joy relefining tasviri birinchi o‘rinda turadi) va boshqalar misol bo‘la oladi.

Maxsus topografik kartalar deb, nashr qilingan topografik kartaning ustiga binafsha rangida tushirilgan joy to‘g‘risidagi ma’lum bir qo‘shimcha axborot turini aks ettiruvchi kartalarga aytiladi. Ularga geodezik ma’lumotlar kartasi, joy o‘zgarishlari kartasi (tezkor o‘zgartirilgan kartalar), daryo qismlari kartasi va boshqalar misol bo‘la oladi. Maxsus topografik kartalar ham topografik kartalarga xos bo‘lgan barcha xususiyatlarga ega bo‘ladi. Maxsus topografik kartalar ham o‘z navbatida ikkiga – oldindan tayyorlanadigan (ularga geodezik ma’lumotlar kartasi, joy o‘zgarishlari kartasi, daryo qismlari kartasi kiradi) va jangovar harakatlar jarayonida tayyorlanadigan maxsus topografik kartalar (ularga joyning fotohujjatlari kiradi) turlariga bo‘linadi.

Agar XX asrda fan-texnika aytarli rivojlanmasa va kartalar faqat qog‘ozda tasvirlana borganda yuqoridagi tasniflash kartalarning turlanishini to‘la aks ettirgan bo‘lar edi. Biroq elektron axborot vositalarining jadal rivojlanishi raqamli ko‘rinishdagi kartalarning yaratilishiga ham asos bo‘ldi. SHunday qilib, kartalar chizma va elektron-raqamli kartalarga ajratiladigan bo‘ldi. Ko‘rinishning bu asosiy turlari barcha turdagi kartalarga tegishlidir (mavzuning 4.3 va 4.4 bandlariga qarang).