Тактиканинг фан сифатида вазифалари

8.2. Joyning mahalliy elementlari
YUqorida ta’kidlanganidek, joyning mahalliy elementlari yaratilish nuqtai nazaridan ikki yirik guruhga ajratiladi – tabiiy va texnogen.
Joyning tabiiy ob’ektlari
Joyning tabiiy ob’ektlariga uzoq geologik tarix davomida yaralgan va inson qo‘li bilan o‘zgartirilmagan barcha ob’ektlar kiradi. Joyning tabiiy ob’ektlari ularning tashqi belgilariga ko‘ra quyidagi turkumlarga ajratiladi.

Gidrografik ob’ektlar.

Gidrografik ob’ektlar – o‘zida suvni mujassam qilgan jamiki ob’ektlardir. Daryolar, ko‘llar hamda doimiy qor va muzliklar respublikamizda uchraydigan asosiy gidrografik ob’ektlardir.

Daryolar – bu tabiiy o‘zanda oquvchi suv havzalaridir. Daryolar bir-biri bilan tutashib, katta daryo havzalarini hosil qiladi. O‘zbekiston Respublikasi hududini ikki yirik daryo havzasi – Amudaryo va Sirdaryo egallagan.

Ko‘llar – tabiiy chuqurliklarda hosil bo‘lgan ochiq suv havzalaridir. Ko‘llar o‘z suvining davriy almashib turishiga ko‘ra ikki turga bo‘linadi: oqar ko‘llar va oqmas ko‘llar. Oqar ko‘llar daryo havzalarida paydo bo‘ladi va ularning suvi ichishga yaroqli – chuchuk bo‘ladi. Farg‘ona viloyatidagi Qubbon ko‘li (SHohimardon) ana shunday ko‘llardan biridir. Oqmas ko‘llar relefning botiq qismlarida paydo bo‘ladi. Oqmas ko‘llarning suvi sho‘r bo‘ladi. Orol dengizi tektonik soylikda joylashgan oqmas ko‘ldir.