Ишдаги ҳужжатлардан ва суд жараёнида аниқланган ҳолатлардан маълум бўлишича, “Marma Servis” МЧЖ Самарқанд шаҳар давлат хизматлари маркази томонидан 2018 йил 13 сентябрда 2588-рақам билан рўйхатдан ўтказилган.
“Marma Servis” МЧЖ таъсис шартномаси ва устави асосида фаолият юритиб, жамият иштирокчиларининг маблағларини бирлаштириш йўли билан ташкил этилган, устав капиталининг жами ҳажми 100,0000 сўм бўлиб, жамиятнинг таъсисчилари Устав капиталидаги улуши:
T.Ҳакимовнинг 70 % (70,0000 сўм);
Б.Собировнинг 15 %(15, 0000 сўм);
Д.Рустамовнинг 15 %(15, 0000 сўм) миқдорида белгиланган.
Жамият Низомининг 4.5-бандига кўра, жамият давлат рўйхатидан ўтаётган пайтда иштирокчиларнинг ҳар бири ўз улушининг 30 фоизидан кам бўлмаган қисмини киритган бўлиши кераклиги, жамият давлат рўйхатидан ўтган пайтдан бошлаб бир йил ичида ҳар бир иштирокчи ўз улушини тўлиқ киритиши лозимлиги, 3.6.-бандига кўра, жамият рўйхатга олинганидан сўнг бир йил ўтгач улушлари тўлиқ миқдорда киритилмаган тақдирда, ўз улушларини киритмаган ёки тўлиқ миқдорда киритмаган иштирокчи жамият олдида қонунга кўра жавобгар бўлиши белгиланган.
Бироқ, Б.Собиров ва Д.Рустамовлар жамият давлат рўйхатидан ўтган пайтдан бошлаб бир йил ичида ҳар бир иштирокчи ўз улушини тўлиқ киритиши лозим бўлса-да, мазкур мажбуриятларини бажармасдан келганлиги аниқланган.
АТ “Асака банк” Самарқанд вилояти Сиёб филиалининг 2020 йил
11 февралдаги 09/153-сонли жавоб хати билан, “Marma Servis” ПБТ МЧЖнинг 2018 йил 1 январдан 2019 йил 31 декабргача бўлган даврда Б.Собиров ва Д.Рустамовлар томонидан банк кассасига жамиятнинг устав капиталини шакллантириш учун нақд пул маблағлари топширилмаганлигини маълум қилган.
ТИФ Миллий банки АЖ Самарқанд вилоят филиалининг 2020 йил
2 февралдаги XV1227/11-сонли жавоб хати билан, “Marma Servis” ПБТ МЧЖнинг 2018 йил 31 декабрдан 2020 йил 10 февралгача бўлган даврда Б.Собиров ва Д.Рустамовлар томонидан банк кассасига жамиятнинг устав капиталини шакллантириш учун нақд пул маблағлари топширилмаганлигини маълум қилган.
“Marma Servis” ПБТ МЧЖ иштирокчиси T.Ҳакимовнинг ташаббусига кўра, 2019 йил 6 февраль куни соат 11:00да Самарқанд шаҳри, Геофизиклар қўрғони, Ибн Сино кўчаси 8 А уйда навбатдан ташқари умумий йиғилиши чақирилган.
Бу ҳақда, жамият уставининг 5.4 бандига мувофиқ жамият расмий сайтига ва барча жамият иштрокчиларининг электрон корпоратив почта манзилларига ўттиз кун олдин эълон берилган ҳамда жамият иштирокчилари Б.Собиров ва Д.Рустамовларга ҳам навбатдан ташқари умумий йиғилиш бўлиб ўтиши тўғрисида хабарнома юборилган. Мазкур хабарнома А. Расуловга почта хабарномаси орқали топширилган бўлса-да, таъсисчи ушбу умумий йиғилишда ҳеч бир сабабсиз иштирок этмаган.
Б.Собиров эса бир вақтнинг ўзида Тошкент шаҳрида рўйхатдан ўтган “Sano fan” МЧЖ қўшма корхонасининг директори сифатида фоалият юритаётганлиги аниқланган. Шунингдек, у охирги бир ярим йил давомида жамият ишларида бирор марта иштирок этиш масаласида жамият билан боғланишга ҳаракат қилмаган ҳамда хабарнома юборилганда чет давлатга чиқиб кетганлиги аниқланган.
Тошкент шаҳар “Тожмахал” МФЙ раиси ва фаоллари томонидан тузилган 2020 йил 15 июнь кунидаги далолатнома билан Тошкент шаҳар Яшнобод тумани Абу-Бакр-Розий кўчаси 23 уй 50 хонадонда истиқомат қилувчи 1973 йилда туғилган Б.Собиров ҳозирги вақтда чет давлатга чиқиб кетганлиги маълум қилинган.
Жамиятнинг 2019 йил 6 февраль 2-сон йиғилиш кун тартибида жамиятга янги иштирокчининг қўшимча ҳисса киритиши ҳисобига жамият устав капиталини кўпайтириш масаласи қўйилган. Йиғилиш якунига кўра жамиятга янги иштирокчи қабул қилиниб, жамият устав капитали 150, 00000 млн сўмга кўпайтириш тўғрисида қарор қабул қилинган.
Юқоридаги ҳолатлардан келиб чиққан ҳолда даъвогар T.Ҳакимов жамият иштирокчилари Б.Собиров ва Д.Рустамовлар ўз мажбуриятларини қўпол равишда бузаётганликларини баён этиб, уларни жамият иштирокчилари сафидан чиқаришни сўраган.
