Tafakkur buzilishlari

Optik-fazoviy agnoziyasi

• Agnoziyaning bu turi, ko’pincha, bosh miyaning o’ng yarim shari (tepa-ensa sohalari) yoki ikkala yarim shar ham zararlanganda kuzatiladi. Bunda bemorlar narsalarning fazoviy belgilarini tasvirlab bera olmaydilar. Bu yerda narsalarning yoki atrof-muhitdagi ob‘ektlarning katta-kichikligining ahamiyati yo’q. Agnoziyaning bu turida chap va o’ng tomonlarni farqlash ham buziladi va bemor ob‘ektlarning bir tomonini tan olmaydi, masalan, daraxt, uy, gul. Bu holat «bir tomonni tan olmaslik» sindromi deb ataladi. U asosan, bosh miya o’smalarida va og’ir jarohatlarda kuzatiladi. Bu sindromni biz bosh miya o’ng yarim sharining qon bilan ta‘minlaydigan sohaning o’tkir ishemik insultlarida ham kuzatganmiz. Optik-fazoviy agnoziya bosh miyaning o’ng yarim shari zararlanganda ko’p kuzatilgani uchun bemorlar ob‘ektlarning chap tomoni borligini go’yoki inkor qilishadi. Bunday bemorlar hatto o’zining chap tomonini ham tan olishmaydi, qo’l-oyoqlari harakati saqlangan bo’lsa-da, bemor ko’ylagi va shimini kiyayotganda chap qo’lini ishlatmaydi. Bu sindrom chap tomonlama fazoviy agnoziya deb ham ataladi.