Tafakkur buzilishlari

Amnestik afaziya

• Amnestik afaziya. 37 va 40-maydonlar zararlanganda kuzatiladi. Amnestik afaziyada nutqning nominativ funksiyasi buziladi. Amnestik afaziyaning mexanizmlarini tushuntirib berishga ko’p urinishlar bo’lgan. Klassik tadqiqotchilarning bu boradagi fikrlarini keltirib o’tamiz: K. Vernike va A. Lixtgeym amnestik afaziyani «so’zlarning motor va sensor obrazlari» orasidagi bog’lanishlarning buzilishi deb bilsa, K. Kleyst va S. Xenshen so’zlar xotirasi markazining parchalanishi bilan bog’lashgan. K. Goldshteyn amnestik afaziyada narsalarning nomini unutishni abstrakt fikrlashning buzilishi bilan bog’lagan. L.S. Vigotskiy esa «Afaziyaning bu turida, aksincha, abstrakt fikrlashdan anik fikrlashga o‘tishning buzilishi asosiy ahamiyatga ega», deb aytgan. A.R. Luriya «Amnestik afaziyada narsalarning nomini aytish va hodisalarni ta’riflashda bemor ongida mavjud bo‘lgan bir nechta so‘zlardan keragini tanlab olish buziladi», deb aytgan.
• Sensor va akustik-mnestik afaziyadan farqli o’laroq, amnestik afaziyada so’zning boshini aytib yuborish yordam beradi. Nutqning nominativ funksiyasi buzilsada, boshqa funksiyalari yozish va o’qish saqlanib qoladi. Amnestik afaziya alohida holda juda kam uchraydi va u asosan, akustik-mnestik yoki semantik afaziya bilan birgalikda kuzatiladi.