46-модда. Тадбиркорлик фаолиятини қўллаб-қувватлаш фондлари Тадбиркорлик фаолиятини қўллаб-қувватлаш ва рағбатлантириш мақсадида қонун ҳужжатларида белгиланган тартибда фондлар ташкил этилиши мумкин.
LexUZ шарҳи Қаранг: Ўзбекистон Республикаси Фуқаролик кодексининг 75-моддаси, Ўзбекистон Республикасининг «Жамоат фондлари тўғрисида» ва «Нодавлат нотижорат ташкилотлари тўғрисида»ги қонунлари. 47-модда. Кичик ва хусусий тадбиркорлик субъектларига энергия манбалари истеъмоли борасидаги имтиёзлар Қишлоқ хўжалик товарлари ишлаб чиқарувчилар учун энергия манбалари бўйича белгиланган имтиёзли тарифлар қишлоқ жойларда жойлашган ҳамда фаолиятни амалга ошираётган кичик ва хусусий тадбиркорлик субъектларига татбиқ этилади.
48-модда. Тадбиркорлик фаолияти учун кадрлар тайёрлашни давлат томонидан қўллаб-қувватлаш Давлат тадбиркорлик фаолияти субъектлари кадрларини тайёрлаш, қайта тайёрлаш ва уларнинг малакасини ошириш тизими ривожлантирилишини таъминлайди.
Қишлоқ жойлардаги тадбиркорлик фаолияти субъектлари кадрларини тайёрлаш, қайта тайёрлаш ва уларнинг малакасини оширишни амалга оширувчи ташкилотлар қонун ҳужжатларида белгиланган тартибда имтиёзлардан фойдаланади.
6-боб. Якунловчи қоидалар 49-модда. Тадбиркорлик фаолияти субъектини тугатиш (унинг фаолиятини тугатиш) Олдинги таҳрирга қаранг. Юридик шахс бўлган тадбиркорлик фаолияти субъектини тугатиш унинг муассисларининг (иштирокчиларининг) ёки таъсис ҳужжатлари билан тегишли ваколат берилган юридик шахс органининг қарорига ёхуд суднинг ёки рўйхатдан ўтказувчи органнинг қарорига кўра амалга оширилади.
(49-модданинг биринчи қисми Ўзбекистон Республикасининг 2019 йил 11 декабрдаги ЎРҚ-592-сонли Қонуни таҳририда — Қонун ҳужжатлари маълумотлари миллий базаси, 12.12.2019 й., 03/19/592/4144-сон) Тадбиркорлик фаолияти субъекти тугатилаётганида бўшатилаётган ходимларга қонун ҳужжатларига мувофиқ уларнинг ҳуқуқлари ва қонуний манфаатларига риоя этилиши кафолатланади.
LexUZ шарҳи Қўшимча маълумот учун қаранг: Ўзбекистон Республикаси Меҳнат кодексининг 67-моддаси ва Ўзбекистон Республикаси «Аҳолини иш билан таъминлаш тўғрисидаги»ги Қонуннинг IV-бобига («Ишдан маҳрум бўлган чоғдаги ижтимоий кафолатлар»). Жисмоний шахс бўлган тадбиркорлик субъектининг фаолиятини тугатиш унинг қарорига ёки суд қарорига кўра амалга оширилади.
Тадбиркорлик субъекти унинг тугатилиши (фаолияти тугатилиши) ҳақидаги ёзув рўйхатдан ўтказувчи органнинг тегишли давлат реестрига киритилганидан кейин тугатилган (фаолияти тугатилган) ҳисобланади.
Тадбиркорлик субъектини тугатиш (унинг фаолиятини тугатиш) қонун ҳужжатларида белгиланган тартибда амалга оширилади.
LexUZ шарҳи Қўшимча маълумот учун қаранг: Ўзбекистон Республикаси Фуқаролик кодексининг 53—57-моддалари, Вазирлар Маҳкамасининг 2019 йил 21 августдаги 704-сон қарори билан тасдиқланган «Тадбиркорлик субъектларини ихтиёрий тугатиш ва уларнинг фаолиятини тўхтатиш тартиби тўғрисида низом» ҳамда «Молия-хўжалик фаолиятини амалга оширмаётган тадбиркорлик субъектларини давлат реестридан чиқариш тартиби тўғрисида низом».