Sos Bolalar mahallalari

2000 yili o‘z faoliyatini boshlagan Toshkentdagi «SOS — bolalar mahallasi» hududida xalqaro tashkilotlar va davlatimizning beqiyos g‘amxo‘rligi tufayli 14 ta zamonaviy oilaviy uy, bolalar bog‘chasi, ma’muriy bino, mehmonxona hamda sport maydonchasi barpo etilgan. 14 uyning har birida «SOS ona» va o‘rtacha 6-8 nafar bola bilan baxtli oila muhitida istiqomat qilishmoqda. «SOS onalar»ga «SOS xola»lar yordam berib turadi. Hozirgi kunda mahallada 3 yoshdan 16 yoshgacha bo‘lgan 76 nafar bola oila modeliga yaqinlashtirilgan muhitda istiqomat qilayapti.

• 2007 yildan boshlab «O‘zbekiston SOS Bolalar mahallalari uyushmasi» ota-onaning ajralishi, farzandini tashlab ketishi oqibatida yuzaga kelayotgan ijtimoiy yetimlikning oldini olish maqsadida O‘zbekistonda oilani mustahkamlash dasturini amalga oshirib kelmoqda. Bu dasturning maqsadi ijtimoiy yetimlikning oldini olishga qaratilgan bo‘lib, unda mahalliy hokimiyat, mahalliy o‘zini o‘zi boshqarish organlari va jamoat tashkilotlari hamkorlikda nosog‘lom muhit hukmron oilalarga yordam beriladi. Ular o‘z farzandlariga yaxshiroq g‘amxo‘rlik qila olishlari uchun salohiyatlarini oshirish va rivojlantirishlariga ko‘maklashiladi.

Mazkur loyihaning asosiy vazifalaridan yana biri ijtimoiy zaif oilalardagi ota-onalarning farzand tarbiyasi borasidagi ko‘nikmalarini yaxshilashdan iborat. Ular uchun bolalar psixologiyasi, ziddiyatshunoslik, bola tarbiyasi kabi mavzularda hozirgacha 9 ta trening mashg‘ulotlari o‘tkazildi. Ularda 36 nafar ota-ona, 8 nafar mahalla yetakchilari ishtirok etishdi. Oila va bolalarga ularning ehtiyojlaridan kelib chiqqan holda ijtimoiy ta’lim borasida, psixologik, huquqiy va boshqa turdagi yordamlar ko‘rsatilayapti.

SOS bolalar mahallasining oilasiga qabul qilinadigan bolalar SOS Kinderdorf International standartlari asosida atroflicha tekshiruvdan o'tadilar, - deydi mahalla direktori Husan Rustamov. - Bizga tarbiya uchun berilayotgan bolalar tegishli tashkilotlarning homiyligi va vasiyligi asosida amalga oshiriladi. Ko'pchilik tarbiyalanuvchilarimiz ijtimoiy yolg'iz bolalar bo'lib, ularning ota-onalari yoki ularning o'rnini bosuvchilar turli sabablarga ko'ra bolalarni boqa olmagan va tarbiyalay olmagan. Ular SOS bolalar mahallasiga kelgunga qadar ijtimoiy yolg'izlik, ijtimoiy va pedagogik qarovsiz sharoitda bo'lganlar. Odatda bunday bolalarning xulq-atvorlarida ayrim muammolar bo'ladi.

Mazkur uyushma loyihasi asosida 2000 yilda «SOS Kinderdorf interneshnl» xalqaro jamiyati bilan hamkorlikda poytaxtimizda «SOS-Bolalar mahallasi» tashkil etilgan edi. Endilikda Samarqand shahrida ana shunday mehr-muruvvat maskani o‘z faoliyatini boshladi. 09.06.2007