Сопол ашёлар ва буюмлар Мавзуни сритиш режаси

Ички деворларни пардозлаш тахтачалари. Ички деворларни пардозлаш тахтачалари ҳар хил шаклда ва ўлчамда чиқарилади: квадрат-тўртбурчак (150х100, 150х75 мм), қуруқ пресслаш усули билан олинади.
Қуйма усул билан олинадиган тахтачалар 50х50 мм, 25х100 мм ўлчамларда, қалинлиги 2-3 мм қилиб чиқарилади.
Тахтачаларни ишлаб чиқаришда хом ашё сифатида осон эрийдиган гилтупроқлар ёки ўтга чидамли тупроққа қум, эриш ҳароратини пасайтирадиган қўшимчалар қўшиб ишлатилади.
Пиширгандан кейин тахтачалар ғовак тузилишга эга бўлади, уларнинг юзалари сир билан қопланади.
Сирланган тахтачалар сув ўтказмайди, кислота ва ишқорлар таъсирига бардош беради.
Тахтачалар силлиқ, қиррали, рельефли, гулдор қилиб чиқарилади. Юзаси сир билан қопланган тахтачалар ошхоналар, санитария хоналари, ҳаммомлар, ваннахоналар, кир ювадиган хоналар, савдо, озиқ-овқат ва кимё корхоналарида, лабораторияларда метростанцияларда ва ҳ.к. да ишлатилади.
Пол учун тахтачалар каолинитли гилтупроқдан пластикликни камайтирадиган, эриш ҳароратини пасайтирадиган қў­шимчалар ва бўёқлар қўшиб тайёрланади. Тахтачалар яримқуруқ пресслаш усули билан олинади. Тахтачаларнинг сув шимувчанлиги 4% дан ошмаслиги керак. Сопол тахтачалардан қилинган поллар деярли сув ўтказмайди, ишқаланувчанлиги оз, чангланмайди, яхши ювилади, чидамли, санитария  гигиена талабларига жавоб беради. Бундай тахтачаларнинг камчилиги: иссиқ-совуқни кўп ўтказиши (бино совуқ бўлади) ва мўртлигидир.
Пол учун ишлатиладиган тахтачалар сопол ва мозаика тахтачаларига бўлинади.
Сопол тахтачалар тўғри тўртбурчак, учбурчак, ва кўпбурчаклар шаклида ўлчамлари 50-300 мм гача, қалинлиги 10-15 мм қилиб тайёрланади.
Мозаика тахтачалар гилам шаклида юза томони билан қоғозга ёпиштириб чиқарилади. Бундай тахтачалар квадрат ёки тўғри тўртбурчак шаклида томонлари 23 ва 48 мм, қалинлиги 4-6 мм қилиб чиқарилади.
Мозаика тахтачалардан қилинган полларни ҳар хил гуллар солиб териш мумкин. Гилам шаклидаги мозаика поллар ясаш учун тахтачали полларга караганда кам меҳнат сарф бўлади. Қоғозга терилган тахтачалар орасидаги чоклари 2 мм. Улар қоришма устига тахтача томонини пастга каратиб ётқизилади. Қоришма котгандан кейин қоғоз сув билан ювиб ташланади.
Тахтачалар намлик катта бўлган ва биноларнинг одам кўп юрадиган полларида (ҳаммом, ваннахоналар. ошхона, йўлак­лари, қабулхоналар, метростанциялари ва ҳ.к.) ишлатилади.
Махсус сопол буюмлар