Солиқ ҳисобининг объекти ва предмети

Soliq hisobotini taqdim etish tartibi. Hisobot soliq to’lovchi tomonidan Soliq kodeksida belgilangan muddatlarda, soliq to’lovchi hisobga qo’yilgan joydagi davlat soliq xizmati organiga taqdim etiladi. Ayrim turdagi soliqlar bo’yicha hisobot ham Soliq kodeksida nazarda tutilgan hollarda ob’ektlar bo’yicha hisobga qo’yilgan joy bo’yicha soliq to’lovchi tomonidan taqdim etiladi.
MISOL. Тransport vositalariga benzin, dizel yoqilg’isi va gaz ishlatganlik uchun olinadigan soliq bo’yicha hisobot AYOQSHlar ro’yxatdan o’tgan joydagi soliq organiga emas, balki shoxobcha joylashgan joydagi soliq organiga taqdim qilinadi, shuningdek yer va suv solig’i bo’yicha soliq hisobotlari ham ob’ekt joylashgan joy bo’yicha taqdim qilinadi.
Soliq to’lovchilar Hisobotni o’z xohishlariga ko’ra quyidagicha taqdim etishga haqli:
shaxsan olib borib berish tartibida;
pochta orqali buyurtma xat bilan;
telekommunikatsiya kanallari orqali elektron hujjat tarzida.
Hisobotni davlat soliq xizmati organiga taqdim etish sanasi quyidagilardir:
shaxsan olib borib berilganda - Hisobot davlat soliq xizmati organi tomonidan qabul qilib olingan sana;
pochta orqali buyurtma xat bilan taqdim etilganda - aloqa tashkilotining tamg’asida ko’rsatilgan, pochta jo’natmasi jo’natilgan sana;
elektron hujjat tarzida taqdim etilganda - elektron hujjat davlat soliq xizmati organi tomonidan olingan sana.
Davlat soliq xizmati organi shaxsan olib borib berish tartibida taqdim etiladigan Hisobotni qabul qilib olishni rad etishga haqli emas hamda soliq to’lovchining talabiga binoan Hisobotning nusxasiga hisobot qabul qilib olingan sana to’g’risida belgi qo’yishi shart.
Hisobot telekommunikatsiya aloqa kanallari orqali elektron hujjat tarzida qabul qilib olinganda davlat soliq xizmati organi soliq to’lovchiga bu haqda tasdiqnoma yuborishi shart.
Hisobot dastlabki tarzda kameral nazorat qilinmasdan va uning mazmuni muhokama etilmasdan qabul qilinadi.
MISOL. Yagona soliq to’lovi to’lovchisi bo’lgan xizmat ko’rsatuvchi korxona 1-chorak yakuni bo’yicha 25 aprel kuni soliq organiga quyidagi hisobotlarni shaxsan olib borib taqdim qilmoqda:
- YaSТ hisob-kitobi
- YaIТ hisob-kitobi
- JSHDS hisob-kitobi
- sug’urta badali hisob-kitobi.
Soliq organi xodimi YaIТ hisob-kitobining 50-satrida YaIТ summasining noto’g’ri hisoblanganini payqab qoldi. Bu holda soliq organi xodimi Hisobotni qabul qilib olishni rad etmasdan, soliq to’lovchining talabiga binoan Hisobotning nusxasiga u olingan sana to’g’risida belgi qo’yib qabul qilib olishi shart.
Hisobot quyidagi hollarda davlat soliq xizmati organiga taqdim etilmagan deb hisoblanadi, agar unda:
soliq to’lovchining identifikatsiya raqami ko’rsatilmagan yoki noto’g’ri ko’rsatilgan bo’lsa;
soliq davri va (yoki) soliq yoki boshqa majburiy to’lov summasi ko’rsatilmagan bo’lsa;
Soliq kodeksining 43 va 44-moddalarida Hisobotni tuzishga doir belgilangan talablar buzilgan bo’lsa.
Belgilanmagan shakldagi Hisobot taqdim etilganda soliq xizmati organi hisobot olingan kundan e’tiboran uch kun ichida bu haqda soliq to’lovchiga yozma bildirish yuboradi va aniq fikr-mulohazalarni ko’rsatgan holda uni maromiga yetkazish uchun qaytaradi.
Kamchiliklari tuzatilgan Hisobot uni taqdim etishning belgilangan muddati tugaguniga qadar taqdim etilgan taqdirda, soliq to’lovchiga nisbatan javobgarlik choralari qo’llanilmaydi.