Сиддиқ МЎмин беморликда кечган туйғулар пайғамбар ёши

Б Е Д О Р Л И К

• 
  Бедорлик яшими ва ёки ёмон? –
  

Деган шум саволни берди Эломон.
Мен дедим: – Бедорлик бўлгани яхши,
Фақат жисму жонинг бўлса соғ-омон...


2019 йил
29 июль


Фарғона тез тиббий маркази,
жарроҳлик бўлими.


У МУМКИН-У, БУ МУМКИН ЭМАС

Қариб борар экансан секин,

Ўтар экан йиллар басма-бас.
Бари яхши, бор битта лекин:
У мумкин-у, бу мумкин эмас.

Чекланаркан ҳаракатларинг,

Дейишаркан: дам олинг бирпас.
Сал секинроқ ҳаракатланинг,
У мумкин-у, бу мумкин эмас.

Чиқолмайсан тоғу тошларга,

Қир-адирни кезсанг, етар, бас.
Ўгитларинг ёқмас ёшларга –
Насиҳат ҳам кўп керак эмас.

Ичкарига ҳайдашар дарров

Туриб қолсанг ҳовлида бирпас.
Тўн ёпади эгнингга биров:
Сизга шамоллаш мумкин эмас!

Қадамингни ўйлаб босасан,

Тўрт томонинг – гўёки қафас.
Маслаҳатга қулоқ осасан:
У мумкин-у, бу мумкин эмас.

Тобинг қочиб қоларкан тез-тез,

Вужудинг ҳам сенга бўйсунмас.
Қиларкансан таомда парҳез –
У мумкин-у, бу мумкин эмас.

Керак эмас салбий ҳаяжон,

Ўзини ҳам тийиб юрсин нафс.
Ҳафа бўлманг мендан, онажон –
Қаттиқ соғинч ҳам мумкин эмас.

Ҳар бир онинг – ҳикоя, эртак,

Ҳар бир сўзинг эрур асли дарс.
Бўларкансан баъзида эрмак –
Сўзларинг ҳам ҳеч кимга ёқмас.

Ўйларкансан сўзлашдан олдин,

Қиларкансан ўз ичингда баҳс:
Фикрлашда сал ортда қолдим,
Балки ҳозир мавриди эмас.

Ичкилик-ку мумкинмас асло,

Бўлмоқ керак эмас сира маст.
Хушёр юрмоқ даркор доимо –
Сархушлик ҳам ҳеч мумкин эмас!

Кечиринглар қизлар, гўзаллар,

Сал узоқда олинглар нафас.
Ёзолмайман ишқий ғазаллар –
Энди севиш ҳам мумкин эмас!

Фарзандларим, сизга куч-қувват,

Отларинг энди дуркунмас.
Ҳар нарсага келаркан навбат:
У мумкин-у, бу мумкин эмас.

Ёшлигингда ярашар бари,

Кексаликда кўп нарса – абас.
Кўряпсан-ку ёш ўтган сари:
У мумкин-у, бу мумкин эмас.

Кичик шеърим топти интиҳо,

Мендан ҳафа бўлмасин ҳеч кас.
Ёдингизда турсин доимо:
У мумкин-у, бу мумкин эмас...


2019 йил
3 август