Шахсий гигиена =оидалари

2-мавзу. Шахсий гигиена қоидалари


Мақсад:
Болаларнинг шахсий гигиена қоидалари ҳақида тушунча ва тасаввурларини шакллантириш(тана, кийим, пойабзал), болаларни озодаликка ва покизаликка ҳамда гигиена қоидаларига риоя қилишга ўргатиш.
Зарур жиҳозлар:
Гигиена қоидаларига риоя қилиш тасвирланган суратлар, қўғирчоқ кийим-кечаклари билан.
Машғулотнинг бориши:
Шахсий гигиена ва санитарияга оид кўникмаларни хосил қилишга одатлантириш ишлари кун тартибининг барча қисмларида олиб борилади. Болалар стол атрофида ўтирганларида, кун тартибининг қайси вақтида бўлса ҳам уларнинг тўғри ўтиришини кузатиш, лозим топилса тўғирлаш. Гигиена қоидалари ҳамда тиббий муолажалар, катталарнинг хайрихохлиги тасвирланган суратлар бўйича болалар билан суҳбат ўтказилади.
Болалар ўзлари борган болалар театрлари, спорт тадбирлари ҳақида ихтиёрий сўзлаб берадилар.
Тарбиячи: Бизнинг боғчамизда қувноқ болалар тарбияланадилар. Болалар боғчага озода холда тоза кийимлар кийиб, сочларини ҳам чиройли турмаклаб келадилар. Улар кун тартибига қатъий риоя қиладилар.
Лекин шундай болалар ҳам борки улар шахсий гигиена қоидаларига риоя қилмайдилар ва оқибатда тез-тез касалланиб, боғчага келолмайдилар. Болалар нима учун шундай?
Ҳар бир инсон ўз соғлиги учун қайғуриши лозим, стол олдида тўғри ўтириши, тозалик ва озодаликка риоя қилиши, ўзини тасодифий бахтсиз ходисалар (шикастланиш, бирор жойини кесиб олиш, куйиш)дан муҳофаза қилиши, қишда иссиқ кийинмасдан кўчага чиқмаслиги, катталарнинг маслаҳатларига қулоқ солиши керак.
Болалар олдингиздаги китобчаларни очинг, тарбиячи болаларнинг стол олдида тўғри ўтиришлари лозимлигини эслатиб, китобларда тасвирланган суратларда болаларнинг ўтиришларини кўриб чиқишни таклиф қилади. Кейин кўришнинг инсон хаётида тутган ўрни ҳақида болалар билан суҳбатлашади.
Сўнгра одам танасининг қисмлари, инсон соғлигини асраш учун ўзини парвариш қилишни ўрганиши кераклиги, касалликларни олдини олиш учун эса одам танаси қандай аъзолардан ташкил топганлигини ва уларнинг қандай ишлашини билиши лозимлиги ҳақида гапириб беради
Амалий иш:
Болалардан тана қисмлари ва аъзоларини кўрсатиб беришлари сўралади(бош, юз, бўйин, бадан, оёқлар, кўзлар, қулоқлар, оғиз, бурун, тишлар, тил)
Болалар билимларини мустаҳкамлаш учун савол ва топшириқлар:
Одамнинг нечта қулоқлари ва кўзлари бор?
Чап қўлингиз билан ўнг кўзингизни ёпинг.
Ўнг қўлингиз билан чап қулоғингизни ушланг.
Бошингизни чапга ўнгга буринг.
Одамнинг кўзлари нима учун керак?, қулоқлари-чи?.. ..
Барча аъзолар соғлом бўлиши учун биз улар тўғрисида қайғуришимиз кераклиги, уларни парваришлаш лозимлиги ҳақида гапириб беради
Бир нарса бор кўп асл,
Сени этар мустақил,
У илмингни бойитар,
Камроқ бўлса койитар,
Ўзингда ҳам бордир бил,
Бошингдаги бу .. .. (ақл)
қизил бузоғимни оғилдан
ҳайдасам чиқмайди.(тил)
У ёғи арра буёғи арра
Ўртасида гўшти барра(тиш, тил)
қатор-қатор тош тердим,
Жийрон отни бўш қўйдим.(тиш)
Уйга вазифа:
Болалар, уйда ота-онангизга ўз танангизни, сочларингизни қандай парвариш қилиш, кийим-кечаклар ва пойафзаллар ҳақида гапириб беринг. Ҳар хафта бошларингизни текширтириб, тирноқларингизни олинг, ҳар куни юзингизни ювиб, сочларингизни тараб, озода холда келишга одатланинг.