Ш. А. Сайдуллаев

Давлат функциялари амал қилиш давомийлиги бўйича доимий ва муваққат (вақтинчалик)га бўлинади.
Доимий функциялар қаторига давлат мавжудлигининг ва ривожланишининг барча босқичларига хос бўлган функциялар (масалан: иқтисодий функция) киритилса, муваққат функцияларга эса давлат ўз олдига қўйган муайян мақсад ва вазифаларни амалга ошириши билан ўз аҳамиятини йўқотадиган функциялар киритилади (масалан, табиий ёки техноген ҳалокат ва уларнинг оқибатларини бартараф этиш ва бошқалар).
Ижтимоий аҳамиятига кўра давлат функциялари асосий ва асосий бўлмаган функцияларга бўлинади.
Давлатнинг асосий ва асосий бўлмаган функциялари ўзаро
бир-бири билан боғлиқ бўлиб, давлат тараққиётининг муайян босқичида у ёки бу функциялар ижтимоий аҳамияти юзасидан устувор аҳамият касб этади. Албатта, бундай таснифлаш шартли аҳамият касб этади. Муайян давлатнинг ҳар бир функцияси шу давлат учун объектив заруратдир. Давлат фаолиятининг барча турлари тенг даражада муҳим, бироқ бу фикр, турли босқичларда биринчи навбатда эътибор қаратилиши лозим бўлган устувор йўналишларни белгилаб олиш имкониятини истисно қилмайди. Мана шу устувор йўналишлар давлатнинг асосий фаолият йўналишлари, функцияларига айланади.
Амалга оширишнинг ҳуқуқий шакллари бўйича давлат функцияларини қуйидагича таснифлаш мумкин: ҳуқуқ ижодкорлиги; ижро этиш; ҳуқуқни муҳофаза қилиш.
4.4. ДАВЛАТ ФУНКЦИЯЛАРИНИ АМАЛГА ОШИРИШ ШАКЛЛАРИ

Давлат ўз функцияларини амалга оширишда муайян шакл ва усуллардан фойдаланади. Давлат функцияларини амалга ошириш шаклларининг ҳуқуқий ва ҳуқуқий характерга эга бўлмаган турлари мавжуд.

Давлат функцияларини амалга оширишнинг ҳуқуқий шакллари бўйича қуйидагиларга бўлиш мумкин:

• 
  ҳуқуқ ижодкорлиги;
  
• 
  ижро этиш;
  
• 
  ҳуқуқни муҳофаза қилиш.
  

Ҳуқуқ ижодкорлиги бу норматив-ҳуқуқий ҳужжатларни тайёрлаш ва уларни қабул қилиш бўлиб, мазкур фаолиятсиз давлатнинг бошқа функцияларини амалга ошириб бўлмайди.