Сертификатланган бухгалтер – амалиётчи

1-топшириқ (11 балл)
Ўзбекистоннинг «БАРАКА» компанияси (кейинги ўринларда - Компания), умумбелгиланган солиқ солиш тартибини қўллайди, ҚҚС тўловчиси, қурилиш материалларини (кейинги ўринларда – тайёр маҳсулот) ишлаб чиқаради.
Компания 2018 йил давомида қуйидаги хўжалик операцияларини амалга оширди, қуйида келтирилган барча суммалар ҚҚСсиз кўрсатилган:

1) Жами 10 000 000 минг сўмлик тайёр маҳсулотни реализация қилди. Сотилган тайёр маҳсулот таннархи 7 800 000 минг сўмни ташкил қилади. Ишлатилмаган материаллар 5 750 минг сўмга сотилди. Материалларнинг таннархи 5 300 минг сўм.

2) Воситачилик шартомаси бўйича комиссионерга сотиш нархи 336 000 минг сўмлик тайёр маҳсулот топширилган. Тайёр маҳсулот таннархи 285 000 минг сўмни ташкил қилди. 2018 йилда комиссионер товарнинг 85 фоизини сотув нархида сотди. Комиссионер ҳақи товарни сотиш суммасининг 5 фоизини ташкил қилди, унга комиссионер счёт-фактура ёзиб берди.
3) Ижобий курс фарқи 34 850 минг сўмни ташкил қилди.
4) салбий курс фарқи 29 350 минг сўмни ташкил қилди.
5) Компания ишлаб чиқариш биносининг бир қисмини саккиз ой давомида ижарага берган, ундан ҳар ойда тушадиган тўловлар 3 400 минг сўмни ташкил қилган.
6) Сентябрда офис мебели сотиб олинди, у 14000 минг сўмга тенг узоқ муддатли актив сифатида ҳисобга олинди. Мебелни олиб келиш ва монтаж қилиш Компанияга 300 минг сўмга тушди.
7) Октябрда ҳисобрақамга автомашина учун суғурта шартномасидан суғурта қопламаси (суғурта пули) сифатида 3 400 минг сўм миқдорида пул маблағлари келиб тушди.
8) Августда ёш оила тоифасига кирадиган ходимга уй-жой сотиб олиш учун 160 000 минг сўм миқдорда, аммо солиқ солинадиган фойданинг 10 фоизидан ошмаган миқдорда пул маблағлари ўтказилди (қайтарилмайдиган), СК 159-моддаси.
9) Маъмурий амортизация ажратмалари молиявий ҳисоботга кўра 2018 йилда 67 000 минг сўмни ташкил қилди. Шу жумладан тезлаштирилган амортизация бўйича - 7 000 минг сўм.
10) Маъмурий ходимларга иш ҳақи тўлаш харажатлари 246 000 миг сўмни ташкил қилди, шу жумладан: ижтимоий суғуртага ажратмалар ва жисмоний шахслардан тўлов манбаида олинадиган даромад солиғи 42 000 минг сўмни ташкил қилди.
11) 29 декабрда “Тадбиркорлар уюшмаси” нотижорат ташкилотига 150 000 минг сўм миқдорида аъзолик бадаллари тўланди. «Тадбиркорлар уюшмаси» Ўзбекистон Республикаси Вазирлар Маҳкамасининг қарори билан ташкил этилган. Корхона фаолиятини амалга ошириш учун Уюшмага аъзо бўлиш мажбурий шарт.
12) 2018 йил охирига келиб бухгалтерия ҳисобига асосан фойда солиғи бўйича бюджетга ортиқча тўланган аванс тўловлари 12 500 минг сўмни ташкил қилди.
13) Июлда хўжалик шартномаларини бузганлик учун 160 минг сўм жарималар тўланди.
14) солиқларнинг ўз вақтида тўланмаганлиги учун бюджетга тўланган пенялар 35 минг сўмни ташкил қилди.
15) жорий йилда ходимларнинг рационализаторлик таклифлари учун 5 550 минг сўм тўланди.
16) Корхона раҳбариятининг қарори билан қарз шартномаси бўйича ходимнинг корхона олдидаги 3 000 минг сўмлик қарзи ҳисобдан чиқарилди;
17) маъмурий ходимларнинг ягона ижтимоий тўлови 35 000 минг сўмни ташкил қилди.
Маълумот учун:
Фойда солиғи ставкаси 14 фоизни ташкил этади.
Талаб этилади:
1.1. 2018 йил учун умумий йиллик даромадни аниқлаш. Ҳар бир операция бўйича тушунтириш бериш.
1.2. 2018 йил учун рухсат этилган чегирмаларни аниқлаш. Ҳар бир операция бўйича тушунтириш бериш.
1.3. 2018 йил учун фойда солиғини ҳисоблашда қандай харажатлар чегирилмаслигини кўрсатиш.
1.4. 2018 йил учун фойда солиғини ҳисоблашда қандай харажатлар солиқ солинадиган базани камайтиришини кўрсатиш.
1.5. Фойда солиғини ҳисоблаш учун солиқ солинадиган базани аниқлаш.
1.6. Молиявий ҳисобот учун фойда солиғини ҳамда 2018 йилда бюджетга тўланадиган фойда солиғи суммасини ҳисоблаш.


Ҳисоб-китоблар минг сўмларда бажарилсин. Сонлар яхлитлаб олинсин.