Sanoat xavfsizligi

I. Umumiy qoidalar
1. Mazkur Qoidalarda quyidagi asosiy tushunchalardan foydalaniladi:
akkreditatsiya — sanoat xavfsizligi ekspertizasini amalga oshirish bo‘yicha ekspert tashkiloti omilkorligini rasman isbotlash uchun xizmat qiladigan, vakolatli organ tomonidan buyurtmachini ekspert tashkilotlari faoliyatiga qo‘yiladigan talablarga muvofiqligini baholash va tasdiqlash jarayoni;
akkreditatsiya attestati — akkreditatsiya qilingan ekspert tashkilotlarining sanoat xavfsizligi ekspertizasi bo‘yicha faoliyatni amalga oshirish vakolatini tasdiqlaydigan rasmiy hujjat;
Akkreditatsiya qilish va inspeksiya nazoratini amalga oshirish bo‘yicha komissiya (keyingi o‘rinlarda Akkreditatsiya komissiyasi deb yuritiladi) — ekspert tashkilotlarini akkreditatsiya qilish va ular faoliyati ustidan inspeksiya nazoratini amalga oshirish natijalari bo‘yicha qaror qabul qilish uchun O‘zbekiston Respublikasi Sanoat xavfsizligi davlat qo‘mitasi (keyingi o‘rinlarda Sanoat xavfsizligi davlat qo‘mitasi deb yuritiladi) tomonidan tashkil etiladigan komissiya;
akkreditatsiya sohasi — ekspert tashkilotining faoliyat sohasi;
baholash — muayyan akkreditatsiya sohasi bo‘yicha ekspert tashkiloti faoliyatini ekspert tashkilotlari faoliyatiga qo‘yiladigan talablarga muvofiqligini tekshirish maqsadida vakolatli organ tomonidan tashkil etiladigan jarayon;
buyurtmachi — akkreditatsiyadan o‘tish uchun yoki sanoat xavfsizligi ekspertizasini amalga oshirishga ariza bilan murojaat qilgan tashkilot;
inspeksiya nazorati — akkreditatsiya qilingan ekspert tashkiloti faoliyatini ekspert tashkilotlari faoliyatiga qo‘yiladigan talablarga muvofiqligini qayta baholash jarayoni;
sanoat xavfsizligi sohasidagi ekspert (keyingi o‘rinlarda ekspert deb yuritiladi) — sanoat xavfsizligi ekspertizasini amalga oshiradigan, belgilangan tartibda attestatsiyadan o‘tkazilgan mutaxassis;
sanoat xavfsizligi ekspertizasi (keyingi o‘rinlarda ekspertiza deb yuritiladi) — ekspertiza obyektining unga qo‘yiladigan sanoat xavfsizligi talablariga muvofiqligini baholash;