Sanoat korxonalarining elektr energiya sarfini me’yorlash ko’rsatgichlarini hisoblash

SANOAT KORXONALARINING ELEKTR ENERGIYA SARFINI ME’YORLASH KO’RSATGICHLARINI HISOBLASH.
Reja:
1.Nazariy qism.
2.Ob’ektlarda energiya tejash buyicha energiya tekshiruvi
3.Energiya tejashni tekshirish

Mahsulot birligiga to’g’ri keladigan elektr energiyaning solishtirma sarfi bu – ma’lum bir texnologik jarayon yoki mahsulot ishlab chiqarishda birlik mahsulotga sarf bo’lgan elektr energiya bo’lib, quyidagi ifoda yordamida aniqlanadi:

d=W/A
bu yerda:
W – mahsulot ishlab chiqarishda sarf bo’lgan elektr energiya, kVt∙soat;
A – ishlab chiqarilgan mahsulot soni, (t, kg, m³ va h.k.)
Elektr energiya iste’molini me’yorlashning strukturasi uch pog‘onadan iboratdir.
Birinchi pog‘ona bu –umumzavod pog‘onasini ifodalaydi. Bunda korxonadagi barcha elektr energiya iste’mollari hisobga olinadi, ya’ni asosiy hamda ishlab chiqarish sexlarining elektr energiya iste’moli, isitish, sovitish umuman olganda o‘z ehtiyoji uchun iste’mol qilinadigan energiyaning barcha miqdori, elektr energiya isroflari miqdori, barchasi aniqlanib, umumiy korxona bo‘yicha ishlab chiqarilayotgan mahsulotga nisbatiga olinadi va shu orqali umum korxona bo‘yicha yagona me’yor ko‘rsatkichi aniqlanadi.
Bu ko‘rsatgich quyidagi ifoda yordamida aniqlanadi:
_dzav= (W_seh+W_umumzav+ΔW_pst)/А_{zavod ,}
bu yerda:
W_seh -asosiy va yordamchi sexlarni elektr energiya iste’moli, kVt∙soat;
W_umumzav - korxonada isitishga, yoritishga, vintelyatsiyaga va issiq suv ta’minotiga sarf bo‘ladigan elektr energiya miqdori, kVt∙soat;
ΔW_pst -elektr tarmoqlaridagi elektr energiya isrofi, kVt∙soat;
А_zavod - ishlab chiqarilayotgan mahsulot hajmi.
Ma’lumki, sanoat korxonalarida elektr energiya iste’moli bir tekis emas, ya’ni texnologik jarayonga qarab, mahsulot ishlab chiqarishga bo`lgan talabni o‘zgarishiga qarab, u doim o‘zgarib turadi va bir nechta faktorlarga doimiy ravishda bog‘liq bo‘ladi. Yuqorida aytib o‘tilganidek, ana shunday o`zgarishlarni, faktorlarni hisobga olish albatta me’yoriy ko`rsatgichlarni aniqlashdagi hisob aniqligini oshirishga xizmat qiladi.
Me’yorlash strukturasining ikkinchi pog‘onasida korxona bo‘yicha sex iste’mol qilayotgan elektr energiya iste’molini me’yorlash masalalari ko‘rib chiqiladi va bu yerda asosiy urg‘u texnologik ehtiyojlar bilan bir qatorda sexning o‘z ehtiyojlari uchun iste’mol qilinayotgan elektr energiya miqdori hisobga olinadi. Aynan shu pog‘onada ishlab chiqarilayotgan mahsulot bo`yicha sex normalari o‘rnatiladi va u quyidagi ifoda yordamida aniqlanadi:
_dseh=(W_tex+W_yor+W_ven+W_yord)/А_{seh ,}
bu yerda:
W_tex - texnologik ehtiyojlar uchun sarf bo‘lgan elektr energiya, kVt∙soat;
W_yor - yoritish uchun sarf bo‘lgan elektr energiya, kVt∙soat;
W_ven - sexning vintelyatsiya qurilmalari uchun sarf bo‘lgan elektr energiya, kVt∙soat;
W_yord - yordamchi ehtiyojlari uchun sarf bo‘lgan elektr energiya, kVt∙soat;
А_seh - ishlab chiqarilayotgan mahsulot hajmi.
Me’yorlash strukturasining uchinchi pog‘onasi bu texnologik jarayonlarni o‘zida ifodalovchi pog‘ona hisoblanib, bu yerda aynan ma’lum bir texnologik jarayon bo‘yicha ishlab chiqarilayotgan mahsulot uchun norma ko‘rsatgichlari o‘rnatiladi va bu quyidagi ifoda yordamida aniqlanadi:
d_tex=Р_hi/А ,
bu yerda:
Р_hi - agregatning hisobiy yuklamasi, kVt;
А - ishlab chiqarilayotgan mahsulot hajmi.