Sanoat ishlab chiqarishini tashkil etish

Xususiylashtirish – davlat mulkiga egalik huquqining davlatdan xususiy sub’ektlarga o’tishi jarayoni, xilma-xil mulkchlikni shakllantirish, iqtisodiyotni davlatlashtirishdan qaytish yo’llaridan biri. Mulkni davlat tasarrufidan chiqarish xususiylashtirishdan tashqari shu mulk hisobidan boshqa nodavlat mulk shakllarini vujudga keltirishni ham nazarda tutadi.
Yirik investitsiya loyihasi – umumiy qiymati tijorat banklarining birinchi darajali kapitalining 25 foizidan oshadigan investitsiya loyihasi.
Chet el investitsiyalari – chet ellik investorlar, asosan, daromad (foyda) olish maqsadida tadbirkorlik faoliyati va qonun hujjatlarida taqiqlanmagan boshqa turdagi faoliyat ob’ektlariga qo’shadigan barcha turdagi moddiy va nomoddiy boyliklar va ularga doir huquqlar, shu jumladan, intellektual mulkka doir huquqlar, shuningdek, chet el investitsiyalaridan olingan har qanday daromad.
Chet el investitsiyalari ishtirokidagi korxonalar – aktsiyalarining (ulushlari, paylarining) yoki ustav jamg’armasining kamida o’ttiz foizini chet el investitsiyalari tashkil etadigan korxonalar. Ular O’zbekiston Respublikasi qonun hujjatlariga zid kelmaydigan har qanday tashkiliy-huquqiy shakllarda faoliyat ko’rsatadilar. Chet el investitsiyalari ishtirokidagi korxona uni ta’sis etish yo’li bilan yoki ilgari chet el investitsiyalari ishtirokisiz ta’sis etilgan korxonada ishtirok etish ulushini (payini, aktsiyalarini) yohud bunday korxonani butunlay, shu jumladan, xususiylashtirish jarayonida chet ellik investor tomonidan sotib olinishi natijasida tashkil etilishi mumkin. Chet el investitsiyalari ishtirokidagi korxona davlat ro’yxatiga olingan paytdan e’tiboran yuridik shaxs huquqiga ega bo’ladi. Chet el investitsiyalari ishtirokidagi korxonalar tashkil etish va ularni davlat ro’yxatiga olish tartibi O’zbekiston Respublikasi Vazirlar Mahkamasi tomonidan belgilanadi.
Chek (fors.-toj – pul hujjati) – 1) bankdagi hisobvaraq egasining muayyan summadagi pulni biror shaxsga to’lash to’g’risida bankka yoki kredit muassasasiga yo’llagan yozma buyrug’i, farmoyishi; pul hujjati, qimmatli qog’oz turi; 2) chakana savdoda kassaning xaridordan pulni qabul qilib olgani to’g’risidagi pattasi.
Egalik huquqi – mulk huquqiga tegishli tushuncha; mulkni qo’lda (ya’ni mulkning bevosita mulkdorning o’zida bo’lishi) yoki biron joyda (masalan, bankda, lombardda) saqlab turish bilan izohlanadi.
Eksport (ingl. export, lot. exporto – olib chiqaman, chetga chiqaraman) – tovarlar, xizmatlar, investitsiyalar, qimmatli qog’ozlar, texnologiyalar va boshqalarni tashqi bozorga chiqarish.
Emissiya (lot. emission – chiqarmoq, ishlab chiqarmoq) – muomalaga bank biletlari, barcha shakllardagi pul belgilari va qimmatli qog’ozlar chiqarish.