Самиғов н. А. Бино

Полиметилметакрилат (органик шиша) метакрил кислотасининг метил эфирини полимеризациялаш усулида олинади. Метилметакрилат рангсиз шаффоф модда бўлиб, табиий газ, нефт углеводородларидан мураккаб кимѐвий технологик ишлов бериб тайѐрланади.
Полиметилметакрилатнинг ўта шаффофлиги, рангсизлиги, ултрабинафша нурларни ўтказиши, нурга бардошлилиги, атмосфера муҳитига чидамлилиги у асосида органик шиша маҳсулотлар ишлаб чиқариш имкониятини яратади. Органик шиша ултрабинафша нурларни 73,5% ўтказади, холбуки оддий силикатли ойна 0,6%, силикатли кўзгу ойнаси 3%, кварц шишаси эса 100% шундай нурларни ўтказади. Органик шиша касалхона, витрина, иссиқхона, саноат бинолари табиий ѐритиш мосламалари, безак тўсиқлари ойналари тайѐрлашда ишлатилади. У осон кесилади, жилоланади. Техник органик шишанинг сиқилишдаги мустаҳкамлиги 120-140 МПа, зарбий қовушоқлиги 60-183⁰С ҳароратда камаймайди.
Органик шишанинг иссиққа бардошлилиги кам (80⁰С), едирилишга бардошлилиги етарли эмас; кислота ва ишқор эритмаларига чидамсиз, ацетон ва шу каби органик эритувчиларда осон эрийди, ѐнувчан маҳсулот.
Поливинилацетат (ПВА) винилацетатни полимеризацион усулда синтез қилиб олинади. Винилацетат сирка кислотаси мураккаб эфири ва винил спирти асосида тайѐрланади.
Поливинилацетат смолалари рангсиз, қовушоқ, нурга бардошли, сув билан исталган нисбатда аралашади, ѐғоч, қоғоз, сувалган юзалар ва ш.к. ларга яхши ѐпишади. Улар асосида эмулсион бўѐқлар, елимлар, мастикалар олинади, сувли дисперсиясидан чоксиз поллар, полимерцемент қоришма ва бетонлар тайѐрланади. Поливинилацетат дисперсияси қўшилган минерал боғловчилар асосидаги композицион материаллар сув ўтказмаслиги юқори, кимѐвий муҳитларга чидамли бўлади.
Полиизобутилен [-СН₂-С(СН₃)₂-]_n изобутиленни СНС(СН₃)₂ полимеризациялаб олинади. Изобутилен нефт маҳсулотларини органик синтез қилиб тайѐрланади. Полиизобутилен каучуксимон эластик, полиэтилен каби енгил материал, нисбий узайиши 1000-2000%. У сувга, кислота ва ишқорлар муҳитига бардошли, совуққа юқори чидамли.
Полиизобутилен таркибига қурум, графит, талк ва бошқа ўта майда кукунлар киритилиб герметиклар тайѐрланади. Ундан елимли ленталар, линолеумни ѐпиштириш учун елимлар, гидроизоляция материаллари олинади.