SamDChti akademik litseyi an’anaviy darslarni boshlash arafasida

SamDChTI akademik litseyi an’anaviy darslarni boshlash arafasida

Oliy ta’lim muassasalari tasarrufidagi akademik litseylarda 2020-2021 o‘quv jarayonini an’anaviy tarzda boshlash to‘g‘risidagi 2020-yil 5-oktabr №518-sonli buyruqqa asosan, joriy yilning 15-oktabr kuni Samarqand davlat chet tillar instituti rektori I.M.Tuxtasinov, institut o‘quv ishlari bo‘yicha prorektori F.Sh.Ro‘ziqulov hamda bir qator vakillar tashrif buyurishib, pandemiya sharoitida o‘quv jarayonini tashkil etish bo‘yicha belgilangan tartib – qoidalarning bajarilish sifati bilan izchil tanishishdi.

Ushbu jarayonda SamDCHTI rektori I.M.Tuxtasinov o‘qituvchilar hamda o‘quvchilar bilan suhbatlar olib borib, pandemiya sharoitida o‘quv jarayonlarini olib borishda har bir o‘qituvchi va o‘quvchi mas’uliyat bilan yondashishlari kerakligi, shuningdek, sanitariya - epedemiologik osoyishtalik markazi ijobiy xulosa bersa, boshlanayotgan o‘quv yilini sanitariya talablariga qat’iy rioya etgan holda an’anaviy tarzda boshlash rejalashtirilganligi aytib o’tildi.

SamDCHTI rektori I.M.Tuxtasinov joriy yilda 1-kursga qabul qilingan o‘quvchilarni tabriklab, keyingi o‘qishlariga muvaffaqiyat tiladi. Litsey o‘quvchilarini institut rahbariyati har doim qo‘llab quvvatlashga tayyor ekanligini, iqtidorli o‘quvchilarni rektor stipendiyasiga tavsiya etilishini, hamda litsey o‘quv xonalarini zamonaviy texnika vositalari(kompyuter, videoproyektor va televizor kabi) bilan boyitib borish choralari ko‘rib chiqilayotganini ta’kidlab o‘tdi.

Ma’lumot o‘rnida shuni ham ta’kidlab o‘tish joizki, pandemiya davrida Samarqand davlat chet tillar instituti akademik litseyida an’anaviy o‘quv jarayonlarini boshlash yuzasidan litseyda ta’lim olayotgan o‘quvchilarning ota-onalaridan so‘rovnomalar olindi. Unda 96 foiz ota-onalar ishtirok etishdi. Natijaviy tahlilga ko‘ra 68 foiz ota-onalar o‘quv jarayonini an’anaviy boshlash tarafdori bo‘lishgan bo‘lsa, 32 foiz ota-onalar esa o‘quv jarayonlarini onlayn davom ettirish tarafdorlari bo‘lishdi.

An’anaviy o‘quv jarayonlarida ishtirok etadigan o‘quvchilar akademik litseyda sanitariya-gigiyena qoidalariga qat’iy amal qilgan holda davom ettiradilar.

Institut rektori turli sabablarga ko‘ra an’anaviy darslarga ishtirok eta olmagan o‘quvchilarga akademik litsey tomonidan onlayn darslarni ham sifatli tashkil etish bo‘yicha vazifalarni belgilab berdi va bu borada ham institut har tomonlama qo‘llab quvvatlash choralarini ko‘rayotganligini ta’kidlab o‘tdi. O‘quv jarayonlarini onlayn davom ettirish tarafdori bo‘lganlar esa Samarqand davlat chet tillar instituti akademik litseyi Moodle elektron ta’lim platformasida (http://vdars.uz/) onlayn tarzda davom ettirishadi.