Samarqand avtomobil zavodi tarixi

Samarqand avtomobil zavodi tarixi

• 1995-1996 yillar – avtobuslar, kichik va o'rta yuk ko'taruvchanlikka ega bo'lgan yuk avtomobillar ishlab chiqaruvchi “Samkochavto” qo'shma korxonasini tashkil etish loyihasi ustida ishlar boshlandi. Samarqanddagi “AvtoVAZagregat” OTAJ bazasida “Samkochavto” o'zbek – turk qo'shma korxonasini tashkil etish bo'yicha O'zbekiston Respublikasi Vazirlar Mahkamasining 1996 yil 5 noyabrdagi 381 – sonli qarori chiqarildi.

• 1997 yil – aprel oyidan boshlab Samarqanddagi “AvtoVAZagregat” zavodi bazasida avtomobil zavodi qurilishi boshlandi. Qurilish ishlarini turk qurilish – montaj “DAMA” kompaniyasi bajardi.

• 1999 yil – 1999 yil mart oyidan kompaniyaning tijorat ishlari boshlandi. Avtobuslarning besh rusumini va yuk ko'tarish qobiliyati 1,5 tonnadan 10 tonnagacha bo'lgan “O'zotoyo'l” yuk avtomobillarining 6 rusumini o'zlashtirish rejalashtirildi. Birinchi yildayoq avtobusning 2 rusumi (M 23.9 va M 24.9) yuk avtomobillarining 3 rusumi (35.9, 80.12, 65.9) o'zlashtirildi.

• 2000 yil – M 29.12 avtobusi ishlab chiqarila boshlandi. Bundan tashqari 30 dan ortiq maxsus kuzovlarni ishlab chiqarish yo'lga qo'yildi.

• 2001 yil – 120.14 yuk avtomobili va M 23.12 avtobusi ishlab chiqarila boshlandi.

• 2002 yil – M 50.12 avtobusi ishlab chiqarila boshlandi. Dekabr oyidan boshlab korxonaning sifatni boshqarish tizimi ISO 9001 : 2000 standarti bo'yicha sertifikatlandi.

• 2006 yil – zavodga egalik huquqi o'zgarib, “Samkochavto” qo'shma korxonasi “Samavto” ma'suliyati cheklangan jamiyat deb qayta nomlandi.

• 2007 yil – yanvar oyidan boshlab Yaponiyaning “Isuzu” kompaniyasi N seriya shassisi bazasida mahsulot ishlab chiqarila boshlandi. 2 turdagi avtobuslar (NP 37 va NP 21) va 3 turdagi yuk avtomobillari (NQR 71 PL, NPR 66 LL, NPR 66 PL) ishlab chiqarila boshlandi.

• 2008 yil – С va E seriyadagi katta yuk ko'tarish qobiliyatiga ega bo'lgan “Isuzu” yuk avtomobillari ishlab chiqarish boshlandi. Fevral oyidan boshlab CYZ 51 KLD katta yuk ko'taruvchanlikka ega o'zi ag'dargichlarni va EXZ 51 KL tyagach avtomobillari ishlab chiqarishga kirishildi. Avgust oyidan boshlab F seriyasidagi yuk avtomobillari ishlab chiqarila boshlandi.