Said Chamlija "Hayotdagi eng katta festival-Namoz"

Assalomu alaykum va rohmatulloh
Bismillah
#taqriz
Kitob nomi: "Iymon va huzun"
Muallif: Said Chamlija

"Hayotdagi eng katta festival-Namoz" bir kunda inson besh marta festival oʻtkazsa ,hech qachon baxtsiz va tushkun boʻlmaydi
Soʻzimning avvalida aynan shu asarni oʻqishga qodir qilgan Allohimga hamdlar aytaman.
Umrimiz ham toshqin suv kabi oʻtib bormoqda. Kechagina jajji qizaloq edik.Bugun esa deyarli katta hayotga qadam qoʻyishga shay boʻlib turibmiz . Yillar ketidan yillar oʻtib mana shu hayot maktabining tafakkurga chorlaydigan ustozasi boʻlmogʻimiz darkor.

Yoʻldan ozorni olib tashlash iymondan hisoblansa, fikr va qalbdagi ozorni ketkazish haqida nima desa boʻladi?

Xoʻsh,"Tushkun inson iymonsizmi?" bu borada koʻp fikrlab,ayni damda iymonimiz sustlashib ketayotganligiga amin boʻlishimiz mumkin. Negaki, insonlar kichik muammoga duch kelishlari bilan tushkunlikka tushib qolmoqdalar, ammo bu foniy dunyoda hech narsa boqiy emas. Alloh har narsani hikmat bilan yaratgan ekan, yarim yoʻlda qolganlar, dunyoga mayl berganlarning ham shu yurishida bir hikmat boʻlsa kerak. Alloh taolo insonni mashaqqatlarda toblab mukammal shaklga keltiradi, chunki Sharh surasi 6-7 oyatlarida keltirilganidek, albatta, bir qiyinchilik bilan birga bir yengillik bordir.

Asarda meni eng ta'sirlantirgan hikoya "Kulchaning puliga jannat sotib olaman." hikoyasi boʻldi. Oʻzi ham muhtoj boʻlishiga qaramasdan, jannat sarmoyasi uchun yordamga muhtoj doʻstiga mablagʻ ajratayotgan jajjigina Alining harakatlarini koʻrib ma shaa Alloh deysiz. Zero, Alloh kuchi yetganchalik yaxshilik qilganga jannatni ato etadi.

Asardan oʻzingizga oladigan narsalaringiz juda ham koʻp. Agar, siz sinovlar qurshovida boʻlsangiz, ushbu asarni oʻqib ancha yengil tortasiz. Yaratgan bergan har bir ne'mati uchun shukronalar aytasiz. Hech shubhasiz, biz bu dunyo matohlariga hoy-u havas uchun emas, aksincha bu dunyo hayotiga oxiratda jannatni qoʻlga kiritish uchun kelganmiz. Asarni oʻqir ekanman, bu kitob hech boʻlmaganda bir marta barchamizga hikmatlar ila asqotishiga ishonchim komil.

Xulosa o'rnida asardan iqtibos keltirishni ma'qul ko'rdim:"Aslida,tashvishlar bo'lmasa qayg'ur. Darding bor ekan,Unga yaqinsan. Alloh azza va jalla kimga yaxshilik istasa, uni dard bilan imtihon qiladi... Sinovlar bo'lmaganda Rabbimiz huzuriga quruq qo'l bilan borgan bo'lardik".

Toshqulova Farangiz